Zaj nyeem hnub tim 12 lub 9 hli 2023 (Daily reflection)

ZAJ NYEEM HNUB TIM 12 LUB 9 HLI, HNUB PEB LUB LIS PIAM 23 CAIJ NYOB NRUAB XYOO

COV LUS NYOB HAUV LUS KAS NTAWV MOO ZOO (LK 6: 12-19)

Kwv tij Hmoob, nyob hauv 4 phau Ntawv Moo Zoo, yog Mas Tais Ntawv Moo Zoo, Mas Kos Ntawv Moo Zoo, Lus Kas Ntawv Moo Zoo, thiab Zam Ntawv Moo Zoo; mas tsuas muaj Lus Kas tib tug xwb thiaj hais txog lo lus ‘Hauv Paus Xa Lus’.

Hnub no Lus Kas piav tias Huab Tais Yes Xus xaiv 12 tug thwj tim ua cov Hauv Paus Xa Lus.

Lub npe ‘Hauv Paus Xa Lus’ yog txhais tias ‘tus neeg Huab Tais Yes Xus xaiv los pab tshaj Yes Xus lub Moo Zoo rau zeej tsoom sawv daws.’ Yog li mas cov Hauv Paus Xa Lus thiaj tsum yog ib tug neeg muaj siab ncaj rau cov lus nws yuav coj mus hais qhia lwm tus, nws yuav tsis ua ib lo lus kom ploj li, lawv yuav muab siab rau mloog Huab Tais Yes Xus cov lus.

Tom qab Huab Tais Yes Xus nce mus saum ntuj lawm, nws tseem tau hu Paj Lug thiab Npas Nas Npes los pab xa lub Moo Zoo rau cov neeg teev pej kum dab. Cov Hauv Paus Xa Lus lawv thiaj yog cov tsim tej lub Koom Txoos nyob hauv cov nroog nyob ncig lub haiv txwv Mes Dis Tas Les Nes.

Lub zim txwv no cov sawv cov Hauv Paus Xa Lus chaw yog tsoom Tswv Qhia.

Kwv tij, qhov no yog peb muab hais raws lub Koom Txoos, tab sis tseeb tiag mas peb sawv daws puav leej ua Hauv Paus Xa Lus rau peb cov kwv tij, rau peb lub cuab, rau peb lub zos tau. Tsis yog yuav tos tsoom Tswv Qhia xwb. Qhov peb ua ntawd yog ua tus piv txwv zoo rau sawv daws pom tias peb muaj Huab Tais Yes Xus nyob hauv peb.

Tab sis qhov peb yuav ceev faj, mas yog qhov tias peb txhob ntxeev Huab Tais Yes Xus cov lus qhia, peb txhob muab ntiaj teb lub tswv yim los hloov Huab Tais Yes Xus lub tswv yim, peb yuav pheej xeeb rau Huab Tais Yes Xus cov lus. Yog li mas txhua hnub peb thiaj tsum thov Leej Ntuj Plig Ntshiab tuaj qhib peb lub siab lub tswv yim, kom peb coj lub neej nyob ntiaj teb no mus raws Huab Tais Yes Xus tus lw tiag. Peb yuav niaj hnub nrog Huab Tais Tswv Ntuj tham thiab mloog Huab Tais Tswv Ntuj cov lus hais rau peb.

Nyob zoo sawv daws.