Zaj nyeem hnub tim 13 lub 10 hli 2023 (Daily reflection)

ZAJ NYEEM HNUB TIM 13 LUB 10 HLI, HNUB RAU LUB LIS PIAM 27 CAIJ NYOB NRUAB XYOO

COV LUS NYOB HAUV LUS KAS NTAWV MOO ZOO (LK 11: 14-26)

Kwv tij Hmoob sawv daws, cov His Xas Lais hais tias muaj ntau hom dab; ib tug mas yog tus dab ‘Npes Ntxes Npus’. Tus dab Npes Ntxes Npus no yog ib tug dab yoov mos ntsuab. Kwv tij, peb paub tias yoov mos ntsuab mas nyiam tsaws rau tej niag yam lwj tsw phem; cov His Xas Lais los ib yam, yog li tus dab yoov mos ntsuab los yog Npes Ntxes Npus thiaj yog tus dab qias neeg. 

Thaum lawv hais tias yog Huab Tais Yes Xus hu txog tus vaj dab Npes Ntxes Npus los ntiab dab, mas yog lawv tab tom xav tias Huab Tais Yes Xus hu txog tus txoov dab qias neeg, tus dab tsis huv rov los ntiab cov me nyuam dab tsis huv.

Muaj ib yam nyob hauv lub Moo Zoo hnub no, peb xav muab los tham, yog Huab Tais Yes Xus lo lus tias “Thaum tus neeg muaj zog tuav ntaj tuav hmuv zov nws lub tuam tsev, mas nws lub cuab tam nyob nyab xeeb. Thaum dab tsis huv tawm hauv neeg mus, nws mus ua loj leeb rau hauv tej teb chaws quav poj, nrhiav ib lub chaw so tab sis nrhiav tsis tau. Thaum dab tsis huv rov qab los txog, nws pom lub tsev cheb huv thiab tu du lug cia, ces tus dab ntawd mus coj 7 tus dab tseem tsiv tshaj dua nws nkag los nyob hauv lub tsev ntawd. Thaum kawg tus neeg ntawd lub neej tseem phem tshaj qhov qub.”

Cov kwv tij Hmoob, Huab Tais Yes Xus cov lus no yog hais txog cov neeg xav yuam kev tias yog Huab Tais Yes Xus hu tus vaj dab tsis huv los ntiab cov dab tsis huv, thiab kuj yog Huab Tais Yes Xus ntuas tsoom neeg mloog nws kom lawv ceev faj txhob rov mus coj tus cuj pwm qub.

Hnub no cov lus no kuj yog Huab Tais Yes Xus hais rau peb thiab.

Huab Tais Yes Xus xav ntuas peb kom ua zoo li tus neeg muaj zog tuav ntaj tuav hmuv zov rawv peb lub tsev uas Huab Tais Yes Xus tau tuaj ntiab tus dab tsis huv tawm lawm. Peb yuav zov kom zoo, txhob pub tus dab tsis huv rov nkag tau los nyob hauv peb lub tsev.

Kwv tij, peb lub tsev yog peb lub tswv yim, yog peb lub siab xav ntag. Hnub peb paub Huab Tais Yes Xus, peb ntseeg txog Huab Tais Yes Xus, mas yog peb tau yuav siab tshiab tso tseg lub qub tswv yim, peb tau txia ua tus neeg tshiab; zoo li peb tau cheb tej yam tsis huv tawm hauv peb lub tsev mus, peb tu kom du ntais.

Vim lub siab huv thiab du lug, mas dab phem thiaj haj yam xav chaws los nyob. Ua li mas peb thiaj yuav tuav ntaj tuav hmuv zov txhob pub dab phem lub tswv yim ntxias neeg nkag los tau hauv peb lub siab. Yog kub siab mloog Tswv Ntuj Lo Lus, thiab coj lub neej raws lo lus.

Nyob zoo sawv daws.