Zaj nyeem hnub tim 13 lub 11 hlis 2023 (Daily reflection)

ZAJ NYEEM HNUB TIM 13 LUB 11 HLIS, HNUB OB LUB LIS PIAM 32 CAIJ NYOB NRUAB XYOO

COV LUS NYOB HAUV LUS KAS NTAWV MOO ZOO (LK 17: 1-6)

Kwv tij Hmoob sawv daws, lub Moo Zoo hnub no peb hnov Huab Tais Yes Xus hais txog 2 nqe.

Nqe ib, Huab Tais Yes Xus hais tias peb yeej cheem tsis tau kom txhob muaj kev coj luag ua txhaum, tab sis yuav zoo dua yog yus cheem yus kom txhob coj lwm tus mus ua txhaum. Nqe ob, Huab Tais Yes Xus hais tias yog peb muaj lub siab ntseeg, mas peb muaj peev xwm zam tau rau tus ua txhaum rau peb.

Cov kwv tij, ob nqe lus no tsuas muaj tib lub ntsiab yog kom peb ua tus neeg zoo tshaj mas peb thiaj tsis raug txoj hmoov phem.

Tus neeg zoo tshaj mas nws yuav txuag nws lub siab kom ntshiab, nws yuav coj tus yeeb yam kom zoo, nws ua yam twg mas nws ua nyob hauv kev hlub thiab nyiam luag. Tab sis vim peb yog neeg mas peb thiaj ceeb laj ua tau kom peb zoo tshaj, mas Huab Tais Yes Xus thiaj qhia hau kev rau peb taug, yog ntseeg thiab raws Huab Tais Yes Xus. Huab Tais Yes Xus hais tias “Yog nej lub siab ntseeg loj li lub noob zaub roj, mas nej yuav hais tau rau tsob ntoo txiv pos no tias ‘rho koj cov cag, koj tshais mus cog koj rau hauv dej nuj’, mas tsob ntoo yuav mloog nej lus.”

Kwv tij Hmoob, muaj ntau zaus nyob hauv peb txoj sia, muaj coob leej ntau tus ua txhaum rau peb, lawv pom lawv kev txhaum mas lawv tuaj thov peb kom zam txhaum rau lawv. Tej yam tsis loj mas peb ua ib siab zam tau, tab sis muaj qee yam mas peb ua ib siab zam tsis tau rau lawv; puas yog?

Los nej yuav teb tias nej zam tau txhua yam luag ua txhaum rau nej?

Cov kwv tij, peb yog me nyuam neeg xwb, mas ceeb laj yuav zam tau rau tus tau ua txhaum rau peb kawg, peb lam hais ntawm ncauj tias peb mloog Huab Tais Yes Xus, tab sis peb twb ua tsis tau li Huab Tais Yes Xus hais, vim peb lub siab tsis ntseeg. 

Yog li mas cov kwv tij, peb yuav thov zoo li cov Hauv Paus Xa Lus hais rau Huab Tais Yes Xus tias “Koj txhab kev ntseeg rau peb mas!”

Kwv tij Hmoob, nej los nrog kuv thov Huab Tais Yes Xus ua ke: “Huab Tais, txhua hnub hauv kuv txoj sia mas muaj ntau yam kev ntxias kom kuv txhob ua raws koj lo lus, kuv tsis muaj zog txaus ntaus tsam tej kev ntxias ntawd, mas kuv thiaj thov koj pub lub txiaj ntsim rau kuv, kom kuv muaj ib lub siab ntseeg txog koj mas txhua hnub hauv kuv txoj sia, kuv thiaj yuav ua tau raws li cov lus koj hais rau kuv.” 

Nyob zoo sawv daws.