Zaj nyeem hnub tim 13 lub 12 hlis 2023 (Daily reflection)

ZAJ NYEEM HNUB TIM 13 LUB 12 HLIS, HNUB NCO TXOG LEEJ NTSHIAB LUS XIS AS
COV LUS NYOB HAUV MAS TAIS NTAWV MOO ZOO (MT 11: 28-30)
Cov kwv tij Hmoob, hnub no nej hnov Huab Tais Yes Xus hais ib co lus caw peb kom mus cuag nws, mas peb yuav tau chaw so los siav. Huab Tais Yes Xus hais zoo li no tias “Nej tuaj cuag kuv mas, kuv yuav cia nej so los siav.” Huab Tais Yes Xus kuj hais tias “Nej txais kuv tus quab mus kwv mas, nej kuj kawm ntawm kuv thiab; mas nej tus plig thiaj yuav nrhiav tau chaw so.”
Kwv tij, Huab Tais Yes Xus niaj hnub nrhiav peb thiab caw peb tas zog, nyob ntawm peb saib puas yuav txais Huab Tais Yes Xus lo lus caw. Yog peb txais thiab kawm ntawm Huab Tais Yes Xus, mas Huab Tais Yes Xus cog lus tias peb yuav tau so los siav; yog tau mus nyob pem Ntuj Ceeb Tsheej. 
Huab Tais Yes Xus hais tias “Nej yuav kawm ntawm kuv; yog xyaum ua neeg siab zoo, xyaum ua neeg me tsis muab hlob.” Yog peb ua neeg siab zoo thiab ua neeg me nyob ntawm sawv daws xub ntiag, mas tsis tas yuav tos peb tso lub ntiaj teb no tseg tso, peb mam tau txais kev kaj siab, nyob kaj nrig. Hnub no kiag los peb lub siab yeej yuav kaj, peb lub neej yeej yuav nyob xyiv fab luag ntxhi.
Kwv tij, Huab Tais Yes Xus caw peb kom tig los yuav lub siab tshiab thiab coj tus cuj pwm tshiab, mas txog hnub Huab Tais yug los, peb thiaj yuav koom txais Huab Tais Tswv Ntuj kev zoo siab ua ke tau.
Nej yuav ua neeg siab zoo, tsis muab hlob mog. Nyob zoo sawv daws.