Zaj nyeem hnub tim 13 lub 9 hli 2023 (Daily reflection)

ZAJ NYEEM HNUB TIM 13 LUB 9 HLI, HNUB NCO TXOG LEEJ NTSHIAB ZAM NCAUJ KUB

COV LUS NYOB HAUV LUS KAS NTAWV MOO ZOO (LK 6: 20-26)

Kwv tij Hmoob sawv daws, cov lus hauv hnub no yog Huab Tais Yes Xus hais txog cov tau txoj hmoov zoo, thiab cov tau txoj hmoov phem.

Huab Tais Yes Xus hais tias “Cov tau txoj hmoov zoo mas yog cov pluag, cov tshaib, cov nquaj thiab cov raug luag ua phem rau. Cov tau txoj hmoov phem yog cov nplua nuj, cov tau noj tsau, cov nyob luag ntxhi, thiab cov tau kev cav lus zoo ntawm lwm tus.”

Kwv tij, yog peb muab ua tib zoo xav mas ntshe thaum Huab Tais Yes Xus hais cov lus ntuas no, mas tej zaum yuav muaj cov neeg coob coob tuaj sib ntsauv mloog; tsis hais tus muaj los tus pluag, tus ua tswv los tus qhev, tus ua neej noj qab nyob zoo los tus raug kev txom nyem hauv lub neej. Ib lub teb chaws yeej muaj ntau hom neeg zoo li ntawd tiag. Nyem no los tseem zoo li ntawd.

Yog li mas Huab Tais Yes Xus thiaj xav ntuas tsoom sid kom tso lub neej qub pov tseg, tso lub siab nqaim siab txhav pov tseg tig los yuav lub siab tshiab, hnav tus yam ntxwv tshiab; mas sawv daws thiaj yuav sib pab kho tau lawv lub zej zos los lawv lyb teb chaws kom nyob tau kaj siab lug, sawv daws muaj kev thaj yeeb nyab xeeb.

Tus ziag no luag hais tias nws txoj hmoov phem, mas nws yuav txaus siab rau nws lub neej. Tus neeg nyem no nws txoj hmoov zoo mas nws yuav hlub tus tau txoj hmoov phem, nws yuav faib cuab tam, nws yuav pab nplij luag, nws yuav pub rau luag noj. Sawv daws yuav nyob sib cev, nyob sib nyiam sib hlub.

Thaum sawv daws ua li ntawd, mas yav tom ntej txhua leej txhua tus thiaj yuav tau txoj hmoov zoo, sawv daws yuav pom Tswv Ntuj lub Ceeb Tsheej.

Cov kwv tij, hnub no thov kom peb tig ntsia hauv peb pab pawg, hauv peb lub zos los lub nroog; puas tseem muaj tus neeg pluag, tus neeg tshaib, tus quaj ntsuag, los tus raug luag hiam. Peb tig rov los ntsia hauv peb lub neej, saib peb xav li cas, peb puas hlub cov neeg nyob hauv kev txom nyem, peb puas txaus siab rau peb lub neej, peb puas yuav qee lub neej mus pab luag lwm tus tau.

Yog peb sib nyiam sib hlub xwb, mas tas sawv daws thiaj yuav tau txoj hmoov zoo mog. 

Nyob zoo sawv daws.