Zaj nyeem hnub tim 14 lub 11 hlis 2023 (Daily reflection)

ZAJ NYEEM HNUB TIM 14 LUB 11 HLIS, HNUB PEB LUB LIS PIAM 32 CAIJ NYOB NRUAB XYOO

COV LUS NYOB HAUV LUS KAS NTAWV MOO ZOO (LK 17: 7-10)

Kwv tij Hmoob sawv daws, thaum peb hnov lub Moo Zoo hauv hnub no mas peb yuav xav tias ua cas tus tswv neeg ntawd tsis hlub nws tus tub txib li; tus tub txib mus ua ib hnub teb los mas nws twb sab txaus lawm, tus tswv tsi cia nws so tseem txib nws mus ua hmo thiab tos ntsaig tswm mov tas tso nws mam cia nws tau so.

Xav kom peb muab tig coj los piv nyob hauv peb lub neej, mas peb yuav pom tias nyob hauv peb lub cuab yim neej. Yus thiab yus poj niam los yog yus tus txiv, los yog yus cov me nyuam; sawv daws tawm mus ua liaj ua teb los yog ua hauj lwm ib hnub txwm nkaus. Thaum sawv daws los txog tsev, mas leej txiv los cov me nyuam so los siav, tab sis ua cas leej niam tsis so, nws sawv tsees mus npaj hmo rau sawv daws noj tas tso, nws mam los so.

Cov kwv tij, yog nej yog tus npaj pluas hmo rau nej tsev neeg noj zoo li ntawd, nej yuav zoo siab los nej chim siab? Nej txaus siab ua los nej lam ua kom tas xwb?

Yog nej tsis txaus siab ua, mas nej puas yuav muaj kev zoo siab? Nej yeej tsis muaj.

Tab sis yog nej xav tias qhov ntawd yog qhov nej yuav tsum ua, mas nej yeej yuav tsis yws, los yog chim rau nej tsev neeg.

Lub Moo Zoo hnub no yog zoo li ntawd. Tus tswv neeg yog Huab Tais Ntuj, peb yog cov tub txib. Peb yuav tau mloog Huab Tais Ntuj lo lus txib peb ua hauj lwm, nyaj yuav yws los nroo me ntsis tab sis tsis txhob chim thiab npau taws rau peb tus Huab Tais Ntuj. Peb kawg yuav xav tias qhov Huab Tais Ntuj hais kom peb ua ntawd mas yog qhov tsim nyog peb yuav tsum ua, thiab peb yuav ua kom zoo tshaj raws li peb ua tau. 

Muaj ib hnub Huab Tais Ntuj yuav pauj rov rau peb xwb.

Nyob zoo sawv daws.