Zaj nyeem hnub tim 14 lub 12 hlis 2023 (Daily reflection)

ZAJ NYEEM HNUB TIM 14 LUB 12 HLIS, HNUB NCO TXOG LEEJ NTSHIAB ZAM HWM NTOO CUAM
COV LUS NYOB HAUV MAS TAIS NTAWV MOO ZOO (MT 11: 11-15)
Kwv tij Hmoob, yog nej nco tau mas lub Moo Zoo nag hmo Huab Tais Yes Xus hais kom peb xyaum ua neeg siab zoo thiab tsis muab hlob, mas peb thiaj yuav tau so los siav. Hnub no Huab Tais Yes Xus ntuas tias “Ntuj lub Ceeb Tsheej raug luag sib txeeb, cov neeg siab ceev txeeb lub Ceeb Tsheej.” Lo lus no mas ntshe nej sawv daws mloog mas yuav tsis to taub. Lo lus no ntxeev tau hais tias “Ntuj lub Ceeb Tsheej yog lub cuab tam uas tas sawv daws sib txeeb kom tau ua nws tug. Tus yuav tau txais Ntuj lub Ceeb Tsheej, kawg yog tus muaj lub siab ceev xwb, hos tus qeeb siab nrhiav Ntuj lub Ceeb Tsheej mas nws yuav plam.”
Kwv tij Hmoob, Huab Tais Yes Xus cov lus ntuas no mas yog kom peb kub siab rau nrhiav Ntuj lub Ceeb Tsheej, peb ua tiag txeem mus kom txog, tsis yog ua si.
Peb paub tias Huab Tais Yes Xus qhia peb kom sib nyiam sib hlub, qhia peb kom pab cov neeg txom nyem. Yog li Huab Tais Yes Xus thiaj ntuas peb kom muab siab rau nyiam luag tej, pab sawv daws; txhob maj tso tes khiav thaum peb raug xwv txheej.
Muab piv zoo li niaj hnub chiv peb mus koom lub Txoos Txi Ntuj. Tus neeg tsis tau mus dua, los tus neeg tsis muab siab rau mus, mas zoo li nws nkees thiab ceeb laj mus teev Ntuj kawg, nws tsuas saib ntsoov lub sij hawm saib puas tau tas caij. Thaum luag tej hais nws mus teev Ntuj mas nws ua siab qeeb, hais qhov ub qhov no tuaj kom tau lug lub sij hawm tsis txhob tau mus teev Ntuj.
Kwv tij Hmoob, hnub no nyob hauv Hmoob lub neej, mas yog hnub qhib lub xyoo tshiab. Peb cov Hmoob hais tias nyob hauv hmo peb caug, mas sawv daws yuav zov hmo tos ntuj tshiab qhib, mas sawv daws yuav mus sib txeeb ce dej tshiab mas lub xyoo tshiab no lub cuab thiaj yuav ntsib tej yam zoo thiab tshiab xwb. Ntuj lub Ceeb Tsheej yeej zoo li ntawd, leej twg siab ceev maj ua ntej mas nws yuav tau txais Ntuj lub Ceeb Tsheej los ua nws tug. Nyob zoo sawv daws.