Zaj nyeem hnub tim 14 lub 2 hlis 2023 (Daily reflection)

ZAJ NYEEM HNUB TIM 14 LUB 2 HLIS, HNUB NCO TXOG LEEJ NTSHIAB XIS LIS THIAB ME THOS DES OS
COV LUS NYOB HAUV MAS KOS NTAWV MOO ZOO (MK 8: 14-21)

Cov kwv tij Hmoob, lub Moo Zoo hnub no mas yog txuas zaj nag hmo. Thaum Huab Tais Yes Xus pom tias yog nws nyob twj ywg ntawd mas cov Fas Lis Xais tej lus yuav sib cav txog nws tsis txawj xaus, yog li Huab Tais Yes Xus thiaj sawv mus nce nkoj hla mus rau lwm sab. Huab Tais Yes Xus ntuas cov thwj tim kom txhob muaj ib lub siab zoo xws li cov Fas Lis Xais los yog Hes Los. 
Huab Tais Yes Xus hais tias “Nej xyuam xim mog, nej ceev faj rau cov poov xab Fas Lis Xais thiab cov poov xab Hes Los.”
Tej zaus peb yuav xav tias ‘cov Fas Lis Xais li poov xab zoo li cas? Thiab Hes Los cov poov xab ho zoo li cas?’
Kwv tij Hmoob, cov Fas Lis Xais mas lawv coj tus yam ntxwv muab hlo saib tsis taus lwm tus, lawv tuav rawv txoj cai cia tswj lwm tus kom ua raws li lawv siab ntshaw, lawv ua neeg zoo sab nraud tab sis lub siab nkhaus cuag rab liag. Ntawm Hes Los mas nws yog ib tug nom siab phem lim hiam, nws dia ncuv rau ntiaj teb lub hwj chim, nyiaj txiag, kev plees.
Yog vim li ntawd, Huab Tais Yes Xus thiaj ntuas lawv kom ceev faj tsis txhob pub tej lub tswv yim zoo li hais ua lub poov xab nyob hauv lawv nruab siab.
Vim tias lub poov xab me me tab sis muaj peev xwm ua kom cov hmoov nplej ntsu tuaj tau ib tawb li cas, mas lub tswv yim tsis huv me me hauv nruab siab kuj yuav ua rau txoj kev phem ntsu tuaj puv neeg lub siab thiab. 
Nyob zoo sawv daws.