Zaj nyeem hnub tim 14 lub 8 hli 2023 (Daily reflection)

ZAJ NYEEM HNUB TIM 14 LUB 8 HLI, HNUB NCO TXOG LEEJ NTSHIAB KOS NPES

COV LUS NYOB HAUV MAS TAIS NTAWV MOO ZOO (MT 17: 22-27)

Cov kwv tij Hmoob sawv daws, nyob hauv cov Yus Das tsab cai, cov txiv neej txhua tus yuav tsum them se pab lub Tuam Tsev Teev Ntuj, yog li hnub no cov sau se thiaj tuaj hais Xis Moos Pob Zeb kom pab hais Huab Tais Yes Xus them se.

Kwv tij, Huab Tais Yes Xus nug Xis Moos Pob Zeb tias “Xis Moos, koj xav li cas, cov vaj kav ntiaj teb sau se ntawm leej twg, puas yog ntawm lawv cov tub, los yog ntawm cov qhua?”

Huab Tais Yes Xus lo lus no kuj yog Huab Tais Yes Xus hais rau Xis Moos Pob Zeb tias puas tsim nyog Huab Tais Yes Xus yuav them se los tsis them.

Xis Moos Pob Zeb xav me ntsis, ces nws hais rau Huab Tais Yes Xus tias “Xib Hwb, lawv sau se ntawm tej qhua.”

Tab sis Huab Tais Yes Xus hais ntxiv rau Xis Moos Pob Zeb tias “Yog lawm, tab sis wb txhob ua li ntawd tsam luag to taub yuam kev. Wb yuav tsum them se xws li lwm tus.”

Kwv tij Hmoob sawv daws, yeej yog li Xis Moos Pob Zeb hais tiag, Huab Tais Yes Xus yog Tswv Ntuj Leej Tub, yog tus tswv lub Tuam Tsev Teev Ntuj, tsis tsim nyog Huab Tais Yes Xus yuav them se; tab sis yuav muaj puas tsawg leej ntseeg li ntawd. Yog Huab Tais Yes Xus tsis them se, mas ntshai sawv daws yuav xyav tias ‘nws hais tias nws tuaj ntawm Tswv Ntuj tuaj, ces nws tsis kam them se’, ‘nws muab Tswv Ntuj los dag kom txhob tau them se’, thiab ntshai yuav muaj ntau tus xyav txog ntau yam.

Huab Tais Yes Xus tsis xav kom sawv daws to taub yuam kev li ntawd, nws thiaj hais kom Xis Moos Pob Zeb mus them se.

Kwv tij Hmoob sawv daws, peb rov muab coj los piv rau peb lub neej, peb puas tau tsa peb cai loj dua luag tej.

Peb nyob hauv ib lub teb chaws twg, peb yuav yoog raws lub teb chaws ntawd tsab cai, mas thiaj yuav tsis muaj xaiv muaj lus, thiaj yuav tsis muaj kev sib tawg mog. 

Nyob zoo sawv daws.