Zaj nyeem hnub tim 15 lub 11 hlis 2023 (Daily reflection)

ZAJ NYEEM HNUB TIM 15 LUB 11 HLIS, HNUB NCO TXOG LEEJ NTSHIAB AS NPAWS TUS LOJ

COV LUS NYOB HAUV LUS KAS NTAWV MOO ZOO (LK 17: 11-19)

Cov kwv tij Hmoob, nag hmo nyob hauv lub Moo Zoo mas peb hais tias Huab Tais Ntuj yog tus tswv, nws txib peb ua dab tsi mas peb yuav tau ua, peb yuav ua kom zoo tshaj raws li peb ua tau, ces muaj ib hnub Huab Tais Ntuj yeej yuav pauj rov rau peb. Hnub no, lub Moo Zoo yuav coj peb tig los ntsia nyob hauv peb sawv daws, saib thaum Huab Tais Ntuj pub ib yam zoo rau peb lawm, peb puas yuav nco Huab Tais Ntuj lub txiaj lub ntsig.

Kwv tij, lub Moo Zoo hais tias muaj ib hnub Huab Tais Yes Xus kho 10 tus mob ruas kom rov huv tuaj, tab sis tsuas muaj ib tug yog cov Xas Mas Lias xwb thiaj rov tig los pe Huab Tais Yes Xus thiab ua Huab Tais Yes Xus tsaug.

Cov kwv tij, nyob hauv peb lub neej mas peb tau txais ntau yam zoo tuaj ntawm neeg thiab ntawm Tswv Ntuj tuaj, peb puas tau ua sawv daws tsaug thiab peb puas tau ua Tswv Ntuj tsaug. 

Peb Hmoob muaj ib lo lus ua tsaug tshav ntuj tias “Hnub qab nram ntsis yog peb tsev xyom cuab txawj ua neej xws luag, ces peb xyom cuab yuav tuaj pauj koj txiaj koj ntsim. Yog peb tsev xyom cuab tsis txawj ua neej tuaj pauj tsis tau koj tus txiaj tus ntsim, cuag li yuav nrauj koj tus txiaj tus ntsim uanag tshauv nag thee yaj no os mog!” Lo lus no mas saib zoo nkaus li peb txiav ib txog kev me me rau peb taug tias yog muaj ib hnub peb tsis nco txog tus neeg tuaj pab peb ntawd lub txiaj ntsim, peb tsis pauj rov rau nws los nws tsis txhob tu siab. Zoo li tsis tshua zoo pes tsawg.

Kwv tij, peb tig los yuav lub siab tshiab lawm, mas peb yuav nco ntsoov ua tsaug tus tau pab peb, peb yuav nrhiav lub sij hawm kom rov tau pauj nws tej txiaj ntsig.

Peb yuav nco tias qhov peb tau txais, tau kev pab tsis hais ntawm neeg los Tswv Ntuj, mas tsis yog vim qhov zoo hauv peb; tab sis vim luag tej los yog Tswv Ntuj hlub peb thiab khuv leej peb.

Ntawm peb, mas peb kuj yuav hlub thiab khuv leej cov neeg raug txom nyem thiab.

Nyob zoo sawv daws.