Zaj nyeem hnub tim 15 lub 12 hlis 2023 (Daily reflection)

ZAJ NYEEM HNUB TIM 15 LUB 12 HLIS, HNUB RAU LUB LIS PIAM 2 CAIJ TOS HUAB TAIS
COV LUS NYOB HAUV MAS TAIS NTAWV MOO ZOO (MT 11: 16-19)
Kwv tij Hmoob sawv daws, yog nej muaj me tub me nyuam, nej qhia qhov zoo rau, los yog nej hais kom lawv mus pab nej ua hauj lwm tab sis lawv tsis mloog nej, mas nej puas yuav npau taws, nej puas meem txom. Tej zaum thaum Huab Tais Yes Xus tuaj tshaj lub Moo Zoo rau cov Yus Das, lawv tsis yuav mas ntshe Huab Tais Yes Xus meem txom kawg nkaus. Huab Tais Yes Xus thiaj hais tias “Kuv yuav muab tiam neeg no piv rau leej twg? Tiam neeg no zoo li ib pab me nyuam zaum tom tshav puam. Lawv sib hu tias ‘peb twb tshuab raj, ua cas nej tsis dhia? Peb twb cuab suab nyiav, ua cas nej tsis ntaus hauv siab?’”
Huab Tais Yes Xus yog Tswv Ntuj, tab sis nws xeeb ua neeg, mas nws kuj muaj ib lub siab zoo li neeg thiab, mas nws thiaj muaj kev meem txom thaum sawv daws tsis yuav nws hais.
Kwv tij, nyob hauv peb mas puas yuav zoo li cov Yus Das thaud. Peb puas mloog thiab yuav li Huab Tais Yes Xus cov lus niaj hnub hais rau peb? Puas yuav txog caij peb tig los yuav siab tshiab ua raws li Huab Tais Yes Xus cov lus?
Huab Tais Tswv Ntuj tsim neeg los, nws tso cai rau neeg muaj kev twj lij xaiv yuav qhov neeg nyiam. Huab Tais Tswv Ntuj kuj muaj cai xaiv yuav tus neeg ua xis Huab Tais Tswv Ntuj siab.
Lub caij Tos Huab Tais no, peb yuav xaiv mloog Tswv Ntuj Lo Lus uas yog Huab Tais Yes Xus, peb yuav xaiv ua cov hauj lwm kom xis Tswv Ntuj lub siab nyiam mog.
Nyob zoo sawv daws.