Zaj nyeem hnub tim 15 lub 7 hli 2023 (Daily reflection)

ZAJ NYEEM HNUB TIM 15 LUB 7 HLI, HNUB NCO TXOG LEEJ NTSHIAB NPOS NAS VEES TUS LAS
COV LUS NYOB HAUV MAS TAIS NTAWV MOO ZOO (MT 10: 24-33)

Cov kwv tij Hmoob, hnub no Huab Tais Yes Xus cov lus qhia peb tias txawm peb txoj pa tu, peb tus plig tawm hauv peb lub cev mus, tsis kav peb tus ntsuj plig yuav tsis tuag. Lub cev txawj ploj txawj lwj tiam sis tus plig yuav nyob mus li. Yog li peb txhob ntshai cov neeg ua phem rau peb cev nqaij vim tias lawv yuav tua tsis tau peb tus plig. Tab sis qhov peb yuav ntshai mas yog tus tua tau peb tus plig, qhov ntawd yog tus dab ntxias neeg. 
Kwv tij, peb yuav ua li cas thiaj tsis poob rau dab phem txhais tes?
Kawg yog ntseeg thiab tso siab rau Huab Tais Yes Xus. Yog vim li ntawd Huab Tais Yes Xus thiaj hais tias “Ob tug noog tsig txhuv, liag tsuas muag tau ib npib xwb. Tsis kav tsis muaj ib ib tug poob hauv av tau, yog nej Txiv tsis tso lus. Nej kuj ib yam li ntawd, tab yog nej cov plaub hau, nej Txiv yeej suav tas huv si lawm. Nej tsis txhob ntshai dab tsi mog, nej muaj nqis tshaj tej pab tsig txhuv coob coob ua ke.”
Kwv tij Hmoob, Huab Tais Yes Xus tseem hais ntxiv tias “Leej twg lees rau sawv daws tias nws paub kuv, mas kuv kuj lees rau kuv Txiv nyob saum ntuj tias kuv paub nws. Leej twg tsis lees rau sawv daws tias nws paub kuv, kuv kuj tsis lees rau kuv Txiv nyob saum ntuj tias kuv paub nws thiab.”
Huab Tais Yes Xus lo lus no yog ntuas peb cov neeg ntseeg sawv daws, kom kub siab ua tim khawv txog Huab Tais Yes Xus. Tsis yog peb ntsib tus twg los peb yuav hais tias ‘kuv paub Huab Tais Yes Xus, kuv ntseeg txog nws tiag’, tiam sis yog kom peb txhob thim txoj kev ntseeg txog Yes Xus pov tseg thaum peb raug xwv txheej, ntsib teeb meem, los yog tsis tau raws li peb lo lus thov.
Dhau ntawd, kuj yog kom peb ua raws li Huab Tais Yes Xus cov lus qhia; yog nyiam thiab hlub ib zeej tsoom, pab lawv thiab nplij lawv siab.
Nyob zoo sawv daws.