Zaj nyeem hnub tim 15 lub 8 hli 2023 (Daily reflection)

ZAJ NYEEM HNUB TIM 15 LUB 8 HLI, HNUB PEB LUB LIS PIAM 19 CAIJ NYOB NRUAB XYOO

COV LUS NYOB HAUV MAS TAIS NTAWV MOO ZOO (MT 18: 1-5, 12-14)

Kwv tij Hmoob sawv daws, hnub no peb hnov Huab Tais Yes Xus hais txog 2 lo lus. Thawj lo lus yog Huab Tais Yes Xus ntuas kom peb ua neeg me xws li cov me nyuam. Lo lus tim 2 yog Huab Tais Yes Xus hais txog tus tswv zov yaj nrhiav tau tus yaj poob zoo, mas nws muaj kev zoo siab loj.

Cov kwv tij, hnub no peb tsuas muab thawj lo lus los twm xwb. 

Huab Tais Yes Xus hais tias “Yog nej tsis hloov rov los ua xws li ib co me nyuam mas nej yuav mus tsis tau hauv Ntuj lub Ceeb Tsheej.”

Kwv tij, Huab Tais Yes Xus lo lus no tseem ceeb kawg, yog tias peb ua neej nyob ua ib npoj, ua ib pawg. Vim tias thaum muaj neeg coob coob tuaj sib sau nyob ua tej npoj tej pawg, mas yog sawv daws muab hlob, ib tug tsis yuav ib tug, lawv yuav nyob ua ke sib haum xeeb puas tau. 

Hnub no nyob hauv Huab Tais Yes Xus 12 tug thwj tim kuj muaj zoo li ntawd, lawv sib cav tias nyob hauv lawv 12 tug ntawd, tus twg yuav yog tus loj, yog tus coj sawv daws.

Kwv tij, cov me nyuam me me, lawv lub siab nyob kaj lug, lawv luag ntxhi, lawv lub tswv yim dawb paug xws li daim ntaub dawb tsis tsuas ib qho tsaus. Cov me nyuam me me lawv nyob ib leeg tsis tau, lawv thov kev pab ntawm lwm tus. 

Huab Tais Yes Xus xav kom peb ua zoo li ntawd, ua lub siab kaj lug, luag ntxhi rau sawv daws, muab siab dai dhuam rau Tswv Ntuj xws li cov me nyuam dai dhuam rau leej niam thiab leej txiv, txawj tso lub hwj chim los thov kev pab ntawm sawv daws.

Kwv tij Hmoob, peb yeej pom tias tus neeg twg muab hlob, mas tsis muaj leej twg xav mloog nws, pab nws. Tus neeg twg ua ib tug me tsis ua tub qaug luag tej, mas sawv daws nyiam thiab pab nws ntau.

Peb yuav ua zoo li ntawd mog.

Nyob zoo sawv daws.