Zaj nyeem hnub tim 16 lub 10 hli 2023 (Daily reflection)

ZAJ NYEEM HNUB TIM 16 LUB 10 HLI, HNUB NCO TXOG LEEJ NTSHIAB MAS NKAS LIS MAB LIAB AS LAS NKOS

COV LUS NYOB HAUV LUS KAS NTAWV MOO ZOO (LK 11: 29-32)

Kwv tij Hmoob sawv daws, thaum cov Yus Das hais kom Huab Tais Yes Xus ua ib lub cim rau lawv pom, mas lawv mam ntseeg tias Huab Tais Yes Xus yog Leej Pleev tiag, ces Huab Tais Yes Xus hais rau lawv tias nws yog lub cim ntawd. 

Huab Tais Yes Xus hais ntxiv tias tus twg pom Huab Tais Yes Xus, ces nws hloov siab tshiab mas tus ntawd lub txim yuav sib dua cov tsis ntseeg.

Cov kwv tij, niaj hnub no Huab Tais Yes Xus yog lub cim rau peb tau pom Tswv Ntuj, kom peb ntseeg tias Tswv Ntuj muaj tseeb tiag. 

Kwv tij, Tswv Ntuj yog kev nyiam, Tswv Ntuj hlub neeg thiab zam txim rau neeg mus li; yog li txhua txhua hnub Tswv Ntuj thiaj pub txoj pa thiab txoj sia rau peb, kom peb tau ib lub cib fim ua cov hauj lwm zoo, tau ib lub cib fim tig los yuav lub siab tshiab tso tus qub cuj pwm pov tseg.

Yog hnub no, nej tseem ntsia tsis pom Tswv Ntuj lub cim thiab; mas nej sim nyob ntsiag ntsiag, qhib nej lub siab lub tswv yim, qhib nej ob lub qhov muag ntsia cov neeg, saib tej xwm xeeb nyob ncig nej, mas nej yuav pom Tswv Ntuj lub cim, ces nej mam txiav saib nej yuav ua li cov neeg nyob Nis Nis Vas los yuav ua li cov neeg Yus Das uas tau pom Huab Tais Yes Xus tab sis lawv lub siab tsis xav ntseeg.

Nyob zoo sawv daws.