Zaj nyeem hnub tim 16 lub 11 hlis 2023 (Daily reflection)

ZAJ NYEEM HNUB TIM 16 LUB 11 HLIS, HNUB NCO TXOG LEEJ NTSHIAB MAS NKAS LIS TAS NYOB KOS LES

COV LUS NYOB HAUV LUS KAS NTAWV MOO ZOO (LK 17: 20-25)

Kwv tij Hmoob, cov Fas Lis Xais nug txog Tswv Ntuj lub Ceeb Tsheej, mas yog lawv xav nug saib thaum twg cov His Xas Lais thiaj yuav dim hauv cov Los Mas lub hwj chim, thaum twg cov His Xas Lais thiaj muab ib lub teb chaws twj lij, lawv tsis yog xav paub txog Ntuj lub Ceeb Tsheej.

Kwv tij, Huab Tais Yes Xus teb rau cov Fas Lis Xais tuaj nug ntawd tias “Tswv Ntuj lub Ceeb Tsheej yog ib yam uas qhov muag pom tsis tau, vim Tswv Ntuj lub Ceeb Tsheej nyob nruab nrab hauv nej.”

Huab Tais Yes Xus hais li no mas yog kom lawv txhob ntshaw txog cov His Xas Lais lub Ceeb Tsheej nyob hauv ntiaj teb no, lawv yuav tsis pom qhov ntawd. Tab sis qhov lawv yuav nrhiav mas yog lub Ceeb Tsheej nyob hauv neeg nruab siab. Yog sawv daws sib nyiam sib hlub; tus muaj hlub tus plug, tus ua tswv hlub nws cov tub txib, tus ua nom hlub tsoom pej xeem; mas lawv thiaj yuav pom tau Tswv Ntuj lub Ceeb Tsheej.

Hnub Huab Tais Yes Xus hais rau cov Fas Lis Xais, mas yog hnub Huab Tais Yes Xus coj Tswv Ntuj lub Ceeb Tsheej tuaj txog haiv His Xas Lais lawm, tsuav yog lawv ntseeg thiab mloog Huab Tais Yes Xus ces lawv yuav tau pom Tswv Ntuj lub Ceeb Tsheej. 

Hnub no Huab Tais Yes Xus kuj hais rau peb zoo ib yam li thaum hais rau cov Fas Lis Xais, yog peb ntseeg thiab mloog Huab Tais Yes Xus, mas peb kuj yuav pom Tswv Ntuj lub Ceeb Tsheej nyob hauv peb thiab.

Thaum ntawd Huab Tais Yes Xus nyob nruab nrab hauv tsoom His Xas Lais, tab sis lawv hais tias lawv tsis pom Neeg Leej Tub; yog li txog hnub lawv ntshaw pom Neeg Leej Tub los lawv kuj yuav tsis pom vim lawv tsis ntseeg tias Neeg Leej Tub yog Huab Tais Yes Xus.

Cov kwv tij Hmoob, yog peb tsis ntseeg tias Neeg Leej Tub yog Huab Tais Yes Xus ymas peb kuj yuav tsis pom Neeg Leej Tub nyob nruab nrab hauv peb thiab. 

Kwv tij, Huab Tais Yes Xus yog Neeg Leej Tub tiag, nws raug tsim txom, raug tus tuag saum Ntoo Cuam. Peb kuj ntseeg tias Huab Tais Yes Xus yog Tswv Ntuj Leej Tub, nws sawv hauv qhov tuag rov los thiab nce mus saum ntuj.

Huab Tais Yes Xus yog Tswv Ntuj Leej Tub, nws coj Tswv Ntuj lub Ceeb Tsheej tuaj nyob nruab nrab hauv peb txhua tus. nyob ntawm peb, saib peb puas yuav qhib qhov muag ntsia kom pom Tswv Ntuj lub Ceeb Tsheej los tsis pom.

Nyob zoo sawv daws.