Zaj nyeem hnub tim 16 lub 6 hlis 2023 (Daily reflection)

ZAJ NYEEM HNUB TIM 16 LUB 6 HLIS, HNUB HWM YES XUS LUB SIAB NTSHIAB

COV LUS NYOB HAUV MAS TAIS NTAWV MOO ZOO (MT 11: 25-30)

Kwv tij Hmoob, tom qab Leej Ntuj Plig nqes los 19 hnub, mas yog hnub cov neeg ntseeg hauv lub Koom Txoos Kav Tos Liv yuav ua hmoov hwm Yes Xus lub siab ntshiab. Xyoo no lub Koom Txoos cev 3 zaj hauv Ntawv Ntshiab rau cov ntseeg tau paub txog. Zaj ib yog cov lus nyob hauv Mais Xes phau ntawv Txoj Cai Ob, hais txog Tswv Ntuj xaiv haiv His Xas Lais los ua haiv neeg qee rau Tswv Ntuj vim Tswv Ntuj nyiam lawv. Zaj lus ob yog nyob hauv Zam tsab ntawv, tsab 1 hais tias kev nyiam Tswv Ntuj tsim ib lub siab hlub luag tej. Zaij lus tim 3 yog zaj nyob hauv Mas Tais Ntawv Moo Zoo peb nyuam qhuav tau hnov no, yog Tswv Ntuj qhib lub Moo Zoo rau cov me neeg thiab Yes Xus lub nra.

Lub ntsiab hauv 3 zaj lus hauv hnub no qhia peb tias Tswv Ntuj yog kev nyiam, Huab Tais Yes Xus yog Tswv Ntuj kev nyiam nyob mus li pub tuaj rau peb. Ntawm peb cov ntseeg txog Yes Xus mas peb yog Tswv Ntuj haiv neeg. Yog li peb thiaj yog ib haiv neeg nyob hauv Tswv Ntuj kev nyiam.

Kwv tij, peb thov muab Txiv Plig ขวัญ ถิ่นวัลย์ cov lus nthuav lub Moo Zoo hauv hnub hwm Yes Xus lub siab ntshiab los ntxeev ua lus Hmoob rau nej mloog li no:

Huab Tais Yes Xus lo lus tias “Nej kawm ntawm kuv mog, vim kuv siab zoo, kuv tsis muab hlob”, yog lub ntsiab hais txog Yes Xus lub siab ntshiab. Peb yuav pom txoj kev ntseeg Ntuj cov lus qhia tag nrho nyob hauv Huab Tais Yes Xus lub siab ntshiab no; yog ‘siab zoo, siab hlub, siab mos, siab dawb siab huv, thiab siab ntev’, ces cov neeg ntseeg thiaj yuav kawm ntawm Yes Xus lub siab ntshiab thiab tso lawv lub siab dhia raws li Yes Xus lub siab ntshiab, mas cov neeg coj Ntuj kev cai thiaj paub tias qhov twg tsim nyog ua pub rau lub ntiaj teb.

Qhov tseem ceeb yog ‘sib nyiam sib hlub’ raws li tus Hauv Paus Xa Lus Zam lo lus tias ‘Yog Tswv Ntuj nyiam peb npaum li ntawd, mas peb kuj yuav sib nyiam sib hlub thiab’ (1Z 4: 11). Yog thaum peb sib nyiam sib hlub lawd, peb thiaj yuav nyiam Tswv Ntuj tau. Peb lub siab yuav tsum muaj kev nyiam kub lug xws li Huab Tais Yes Xus, peb yuav tsum nyiam lwm tus li Huab Tais Yes Xus tau nyiam peb raws li nws cov lus hais tias “Nej yuav nyiam nej cov yeeb ncuab, nej yuav ua zoo rau cov neeg ntxub nej, nej foom lus zoo rau cov neeg foom phem rau nej, nej thov Ntuj rau cov neeg xyav nej lub moo” (LK 6: 27-28).

Hnub no Huab Tais Yes Xus ntuas peb tias Tswv Ntuj nyiam peb, Tswv Ntuj xav kom peb muaj lub siab nyiam xws li Huab Tais Yes Xus, mas peb thiaj yuav txawj ua zoo thiab hlub cov neeg peb pom peb ntsib nyob hauv txhua txhua hnub.

Vim Tswv Ntuj nyiam peb tas npaud, nws thiaj xa Leej Tub tuaj txhiv peb hauv qhov txhaum, mas peb thiaj yuav sis nyiam sis hlub tiag tiag.

Thov kom peb sawv daws saib Huab Tais Yes Xus lub siab ntshiab ua lub zog txhawb peb kom txawj nyiam luag lwm tus mog.

Nyob zoo sawv daws.