Zaj nyeem hnub tim 16 lub 8 hli 2023 (Daily reflection)

ZAJ NYEEM HNUB TIM 16 LUB 8 HLI, HNUB NCO TXOG LEEJ NTSHIAB TES FAS NOS NYOB HOOS NQIAS
COV LUS NYOB HAUV MAS TAIS NTAWV MOO ZOO (MT 18: 15-20)

Kwv tij Hmoob sawv daws, hnub no lub Moo Zoo peb hnov Huab Tais Yes Xus hais txog 3 nqe: ntuas tus neeg tau ua yuam kev los yog ua txhaum, lub hwj chim Huab Tais Yes Xus pub rau peb kom khi thiab daws yam nyob hauv ntiaj teb no, koom siab thov Leej Txiv Tswv Ntuj.
Kwv tij, Huab Tais Yes Xus cov lus qhia yog kom peb nyob sib nyiam sib hlub, yog li mas peb yuav tsum nyiam tas sawv daws tsis hais tus txheeb los tus nrug, tus tseem los tus qhua, tus phooj ywg los tus yeeb ncuab. Hnub no Huab Tais Yes Xus thiaj hais rau peb tias thaum peb pom tus neeg twg ua tsis yog mas peb yuav tsis txhob chim rau nws tiam sis peb yuav tau ntuas nws kom tig los ua qhov yog. Peb yuav muab siab rau ntuas nws kom txog qhov kawg, yog nws tsis yuav peb lus li mas peb mam tsum.
Txawm tias txog qhov kawg nws yuav los tsis yuav peb hais, los peb tsum tau zam rau nws mas  Ntuj thiaj yuav zam rau peb thiab zam rau nws. Qhov no yog lub hwj chim Huab Tais Yes Xus pub rau peb.
Kwv tij, dhau ntawd peb kuj yuav tau sib pab thov Ntuj rau tus neeg tau ua yuam kev ntawd, thov kom Tswv Ntuj tsom kev rau nws taug raws nraim Tswv Ntuj txoj kev, thov Leej Ntuj Plig tshoj nws kom tig los yuav lub siab tshiab.
Kwv tij Hmoob, tsis yog yuav thov Ntuj rau tus neeg tau ua yuam kev ntawd xwb, peb kuj yuav thov Ntuj rau peb sawv daws thiab. 
Nyob zoo sawv daws.