Zaj nyeem hnub tim 16 lub 9 hli 2023 (Daily reflection)

ZAJ NYEEM HNUB TIM 16 LUB 9 HLI, HNUB NCO TXOG LEEJ VAJ QHIA NKOS NES LIAS THIAB TSWV QHIA XIS NPLIAS NUS
COV LUS NYOB HAUV LUS KAS NTAWV MOO ZOO (LK 6: 43-49)

Cov kws tij Hmoob, Huab Tais Yes Xus hais tias “Tsis muaj ib tsob ntoo zoo nkauj yuav txi ib co txiv lwj, tsis muaj ib tsob ntoo lwj yuav txi ib co txiv zoo nkauj. Xav paub tsob ntoo mas yuav ntsia lub txiv. Tus neeg zoo kuj rho tej yam zoo tawm hauv nws lub siab los.”
Kwv tij, Huab Tais Yes Xus cov lus no yog hais tau tias peb xav paub tias tus neeg twg yog neeg zoo los phem mas kom peb saib nws tus cuj pwm. 
Kwv tij, peb tseem paub ntxiv tias thaum kawg mas tus neeg zoo nws yuav tau Tswv Ntuj lub Ceeb Tsheej ua cuab tam, ntawm tus neeg phem mas nws yuav mus nyob hauv lub qhov cub tawg tsis txawj kug. Thiab peb kuj paub tias peb yog ib tug neeg muaj txhaum, peb zoo tsis txaus. Tus zoo txhij kawg yog Tswv Ntuj tib tug xwb, yog li mas peb thiaj yuav thov Tswv Ntuj tsis tseg kom pab peb ua tau ib tug neeg zoo xis Tswv Ntuj siab.
Huab Tais Yes Xus hais tias “Tus tuaj caum kuv, nws mloog kuv thiab ua raws li kuv qhia, mas nws zoo li tus neeg txhim lub tsev muaj taw ncej taw ntsa tob, ces thaum cua hlob dej sab sim huam, los lub tsev yuav tsis vau.”
Huab Tais Tswv Ntuj hlub peb sawv daws, nws thiaj yeem tso nws Leej Tub Twm Zeej nqes los cawm peb, los qhia txoj hau kev rau peb taug kom tau ua xis Tswv Ntuj siab.
Kwv tij, peb tau txoj hmoov zoo vim hnub no peb tau paub Huab Tais Yes Xus, peb tau hnov Huab Tais Yes Xus cov lus qhia lawm tiag. Tsuas tshuav ib yam xwb, yog qhov tias thaum peb hnov lawm, peb puas khaws coj mus ua, khaws coj mus kho peb lub siab lub tswv yim, khaws coj mus coj kom nruaj nyob hauv peb lub neej. Yog tias peb ua li Huab Tais Yes Xus cov lus peb niaj hnub mloog, mas cov lus yuav txi tau lub txiv zoo. Lub txiv ntawd yog peb tus cuj pwm, tus yam ntxwv.
Nyob zoo sawv daws.