Zaj nyeem hnub tim 17 lub 2 hlis 2023 (Daily reflection)

ZAJ NYEEM HNUB TIM 17 LUB 2 HLIS, HNUB NCO TXOG XYA TUS LEEJ NTSHIAB TSOB HWB NIAM MAB LIAB
COV LUS NYOB HAUV MAS KOS NTAWV MOO ZOO (MK 8: 34-9: 1)

Kwv tij Hmoob sawv daws, Huab Tais Yes Xus hais kom peb kwv peb tus ntoo cuam raws Huab Tais Yes Xus qab, yog kom peb nrauj peb tus kheej, txhob nco txog peb ua ntej lwm tus, peb yuav saib lwm tus loj dua peb, peb yuav tsum muab tas peb lub neej peb txoj sia los fij rau lwm tus, hlub lwm tus, pab lwm tus, nco txog lwm tus ua ntej xws li Huab Tais Yes Xus tau ua piv txwv cia.
Cov kwv tij, Huab Tais Yes Xus hais ntxiv tias ‘tib neeg yuav muab dab tsi los pauv tau txoj sia?’
Kom peb paub tias txhua tus neeg yug los, thaum kawg yeej yuav tuag, yuav tsis rov yug tshiab ua neeg ntxiv lawm. Neeg lub cev yuav lwj mus ua av, tab sis tus plig mas tsis lwj, yuav nyob mus li.
Peb cov ntseeg hauv lub Koom Txoos Kav Tos Liv ntseeg tias neeg tus plig yuav nyob ib lub teb chaws mus txog hnub ntiaj teb kawg, ces thaum ntawd Tswv Ntuj yuav tsim dua ib lub cev tshiab rau neeg tus plig. Tus neeg ntseeg Yes Xus mas nws yuav tau txoj sia tshiab nyob nrog Tswv Ntuj. Tos peb ntseeg li no vim Huab Tais Yes Xus tau ua piv txwv rau peb pom tias nws tuag tab sis 3 hnub nws sawv rov muaj sia tshiab.
Yog li mas cov kwv tij, tsuas yog txoj kev ntseeg txog Yes Xus xwb thiaj yuav pauv tau neeg txoj sia. 
Tus neeg ntseeg txog Yes Xus, nws yuav ris nws tus ntoo cuam; nws yuav hlub lwm tus neeg, nws yuav muab nws fij rau lwm tus, nws yuav ua qhov zoo mus raws li Huab Tais Yes Xus cov lus qhia. 
Nyob zoo sawv daws.