ZAJ NYEEM HNUB TIM 18 LUB 5 HLIS 2020

Lis piam 6 hauv Caij Hla.
Cov thwj tim yuav raug luag hiam. (Z 15 : 26-16 : 4)
Yes Xus hais tias : “Leej Nplij Neeg yuav tuaj. Nws yog tus uas kuv yuav xa ntawm Leej Txiv tuaj rau nej. Nws yog Leej Ntuj Plig qhia qhov tseeb uas tawm hauv Leej Txiv los, nws yuav ua tim khawv txog kuv. Nej kuj ua tim khawv thiab, vim nej nrog kuv txij lub hauv paus los.
Kuv hais tej no rau nej kom nej txhob dawm ko taw. Luag yuav ntiab nej tawm hauv cov tsev txoos. Luag haj tseem yuav ua phem tshaj, vim txog lub sij hawm uas tus muab nej tua, nws yuav xav tias nws ua ib qho los hawm Tswv Ntuj. Lawv yuav ua li ntawd vim lawv tsis paub Leej Txiv thiab tsis paub kuv. Kuv hais tej no rau nej, kom thaum txog lub sij hawm ntawd, nej nco ntsoov tias kuv twb xub qhia nej lawm. Thaum chiv thawj, kuv tsis tau hais tej no rau nej, vim kuv tseem nrog nej nyob.”