ZAJ NYEEM HNUB TIM 18 LUB 8 HLI 2020

LIS PIAM 20 CAIJ NRUAB XYOOS.
Nyiaj txiag khuam txoj kev raws Yes Xus qab thiab tso ib puas tsav yam tseg yuav tau dab tsi. (MT.19 : 23 – 30)
Yes Xus thiaj hais rau nws cov thwj tim tias : “Kuv hais tseeb rau nej : ib tug neeg nplua nuj yuav ceeb laj nkag mus hauv Ntuj lub Ceeb Tsheej. 
Kuv tseem rov hais dua rau nej : ib tug ntxhuav yuav nkag hauv ib lub qhov koob, mas tseem yooj yim dua ib tug neeg nplua nuj mus hauv Ntuj lub Ceeb Tsheej.” 
Cov thwj tim hnov cov lus ntawd, lawv yoob tas, lawv hais tias : “Yog li leej twg thiaj yuav tau txais kev cawm ?” 
Yes Xus ntsia lawv, nws hais rau lawv tias : “Yog neeg ua neeg xwb mas yeej tsis tau li. Tab sis, ntawm Tswv Ntuj, mas nws ua tau tas ib puas tsav yam.”
Ces Pob Zeb teb rau Yes Xus tias : “Peb, mas peb tso ib puas tsav yam tseg, peb los raws koj, peb yuav tau dab tsi ?” 
Yes Xus hais rau lawv tias : “Kuv hais tseeb rau nej cov uas raws kuv : lub zim txwv uas txhua tsav txhua yam yuav rov plhis tshiab, mas Neeg Leej Tub yuav zaum saum nws lub theej kiab muaj hwj chim, ces nej kuj yuav zaum saum kaum ob lub theej kiab, txiav txim rau kaum ob xeem lub His Xas Lais. Tus uas tau tso vaj tse, kwv tij, muam, niam txiv, me tub me nyuam thiab tso liaj teb tseg, vim kuv lub npe, mas tus ntawd yuav tau txais ntau tshaj qhov nws tso tseg, thiab nws tseem yuav tau txoj sia nyob mus li los ua nws tug. Cov ua ntej, muaj coob leej yuav tuaj tom qab ; hos muaj coob leej tuaj tom qab, yuav tau ua ntej.”