Zaj nyeem hnub tim 18 lub 8 hli 2023 (Daily reflection)

ZAJ NYEEM HNUB TIM 18 LUB 8 HLI, HNUB RAU LUB LIS PIAM 19 CAIJ NYOB NRUAB XYOO

COV LUS NYOB HAUV MAS TAIS NTAWV MOO ZOO (MT 19: 3-12)

Kwv tij Hmoob, hnub no peb hnov cov Fas Lis Xais nug Huab Tais Yes Xus tias ib tug txiv neej puas yuav muaj cai nrauj tau nws tus poj niam, yog nrauj tsis tau mas ua cas Mais Xes thiaj tso cai rau cov txiv neej nrauj tau. Huab Tais Yes Xus teb lawv li cas?

Kwv tij, Huab Tais Yes Xus hais zoo li no “Nej tsis tau nyeem hauv phau ntawv Hauv Paus lod? Nyob hauv phau ntawv Hauv Paus twb hais tias thaum chiv lub keeb, Tswv Ntuj tsim kom muaj txiv neej thiab poj niam. Tswv Ntuj hais rau nkawd tias ‘tus txiv neej yuav tso nws niam nws txiv tseg, ces nws yuav mus npuab nws poj niam, nkawd yuav ua ib lub cev nqaij xwb’.” Huab Tais Yes Xus tseem hais ntxiv tias “Qhov uas Tswv Ntuj sau los ua ke, mas neeg tsis txhob muab cais.”

Kwv tij Hmoob sawv daws, ib tug txiv neej txiav siab yuav ib tug poj niam, mas yeeb vim nkawd muaj lub siab sib nyiam tiag, tsis yog nkawd lam sib sau ua ib cuab xwb. Nkawd yeej yuav txiav siab meej tias lub neej txij hnub no mus, nkawd yuav koob ib lub cuab, nkawd yuav tsis sib tso. Ua li mas nkawd thiaj txiav siab sib yuav.

Tab sis kwv tij Hmoob, peb pom tias nyob rau lub ntuj tiam no muaj ntau nkawm niam txiv, lawv tsa cuab tau ob peb lub hlis, los ob peb lub xyoo xwb, lawv cia li sib cais sib nrauj, thiab ib tog kuj mus nrhiav dua tshiab los kuj muaj. 

Cov kwv tij, nyob hauv txoj kev ntseeg Ntuj, peb ntseeg tias Tswv Ntuj yeej tsim ib tug txiv neej los txi rau ib tug poj niam, nkawd ob leej yeej yog koom ib lub cev nqaij tiag. Yog li ua ntej nkawd yuav sib yuav, lub Koom Txoos thiaj xav qhia nkawd kom paub txog kev sib nyiam sib hlub tiag raws li Tswv Ntuj txoj kev nyiam, tsis yog nkawd sib nyiam vim lub siab sib ntshaw xwb. Lub Koom Txoos kuj tsis pom zoo rau ib tug yawg nrauj los poj nrauj mus yuav dua lwm tus tshiab. Nws yuav yuav tus tshiab tau, mas tsum tau lub tso cai ntawm lub Koom Txoos tso.

Nyob zoo sawv daws.