Zaj nyeem hnub tim 19 lub 7 hli 2023 (Daily reflection)

ZAJ NYEEM HNUB TIM 19 LUB 7 HLI, HNUB PLAUB LUB LIS PIAM 15 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 11: 25-27)

Kwv tij Hmoob sawv daws, thaum Huab Tais Yes Xus teev Ntuj; nws hu txog Tswv Ntuj, nws cav lus zoo txog Tswv Ntuj, nws ua Tswv Ntuj tsaug, nws zoo siab.
Lub Moo Zoo hnub no peb yuav hnov Huab Tais Yes Xus hu Tswv Ntuj ua ‘Huab Tais kav lub ntuj lub teb’, yog Huab Tais Yes Xus qhia rau peb kom ntseeg tias Huab Tais Leej Txiv yog tus tsim ntuj tsim teb, tsim tas puas tsav yam, yog tus tseem Tswv Ntuj tiag, tsis muaj lwm tus tswv ntuj tswv teb loj cuag li Huab Tais Leej Txiv lawm.
Yog li mas cov kwv tij, peb tig los ua Ntuj kev cai, ntseeg txog Yes Xus, mas yog qhov zoo tshaj rau peb lawm tiag. Li ntawd, peb thiaj yuav rau siab ntso teev Ntuj, cav lus zoo txog Huab Tais Tswv Ntuj tus tsim lub sim ceeb.
Huab Tais Yes Xus hais ntxiv tias ‘Koj zais tej yam ntawd rau cov neeg thoob tsib thiab cov neeg ntse, koj ho qhib rau cov me nyuam yaus’. Cov lus no yog Huab Tais Yes Xus nco txog Tswv Ntuj lub txiaj ntsha txiaj ntsig, ces Huab Tais Yes Xus thiaj yuav tau ua cov hauj lwm pab cov neeg me, cov txom nyem kom tau cav txog Huab Tais Tswv Ntuj lub hwj chim.
Huab Tais Yes Xus hais tias ‘Muaj tseeb tiag, Txiv, koj lub siab nyiam li ntawd’. 
Kwv tij, Huab Tais Tswv Ntuj lub siab nyiam li cas? Yog nyiam kom peb ua cov hauj lwm sib nyiam sib hlub, pab cov neeg txom nyem, cov neeg me xws li Huab Tais Yes Xus niaj hnub ua ntag. Cov hauj lwm no, peb hais tias ‘cov hauj lwm khuv leej neeg’.
Huab Tais Yes Xus hais cov lus ua tsaug Leej Txiv tias ‘Txiv muab tas ib puas tsav yam rau kuv. Tsis muaj leej twg paub Leej Tub, tsuas kawg Leej Txiv thiaj paub. Kuj tsis muaj leej twg paub Leej Txiv, tsuas kawg Leej Tub thiaj paub, thiab tus uas Leej Tub pom zoo qhia rau kom paub’.
Kwv tij, muaj li Huab Tais Yes Xus cov lus no tiag, tus twg tsis ntseeg Huab Tais Yes Xus, mas nws yeej yuav tsis paub txog Huab Tais Leej Txiv. Yog li mas peb yuav nquag thov Huab Tais Yes Xus pub kom peb paub Tswv Ntuj peb tus Huab Tais Leej Txiv ib hnub ntau zuj zus tuaj.
Nyob zoo sawv daws.