ZAJ NYEEM HNUB TIM 19 LUB 8 HLI 2020

LIS PIAM 20 CAIJ NRUAB XYOOS.
Zaj paj lug txog tus tswv teb siab zoo. (MT.20 : 1 – 16)
Vim tias Ntuj lub Ceeb Tsheej piv tau rau ib tug tswv teb uas thaum kaj ntug, nws tawm mus nrhiav tub zog tuaj ua nws daim teb txiv cawv. Nws nrog cov tub zog hais haum ib hnub ib lub txiaj nyiag, ces nws xa lawv mus tom daim teb txiv cawv. Ze cuaj teev, nws tawm mus ncig, nws pom ib co neeg nyob dag tom tshav puam. Nws hais rau lawv tias : “Nej mus ua num tom kuv daim teb txiv cawv, kuv yuav muab nqi kom haum nej.” 
Ces lawv mus. Kwv yees tav su, nws rov tawm mus ncig, thaum hnub qaij peb teev nws rov mus ua li qub. Thaum hnub qaij ze li tsib teev, nws rov tawm mus ncig dua, nws tseem pom ib co nyob dag, nws hais rau lawv tias : “Vim li cas nej nyob dag tas hnub ntawm no, tsis ua num dab tsi li ?” 
Lawv hais rau nws tias : “Vim tsis muaj neeg ntiav peb.” 
Tus tswv hais tias : “Nej mus ua num tom kuv daim teb txiv cawv thiab mas.” 
Thaum tsaus ntuj, tus tswv teb hais rau tus tswj nyiaj txiag tias : “Koj hu cov tub zog los, koj muab nyias tus nqe zog rau nyias. Koj xub hu cov tuaj tom qab zuj zus los xaus rau cov xub tuaj.” 
Cov tub zog uas tuaj thaum tsib teev hnub qaij los txog, lawv ib leeg tau ib lub txiaj nyiag. Cov xub tuaj los txog, lawv xav tias lawv yuav tau txais nqi zog ntau dua, tab sis lawv ib leej kuj tau ib lub txiaj nyiag thiab. 
Thaum lawv txais lawv tus nqi, lawv yws rau tus tswv teb tias : “Cov tuaj tom qab ua num ib teev xwb, koj muab rau lawv ib yam li muab rau peb, hos peb, mas peb kwv nra thiab tiv tshav ib hnub.” 
Ces tus tswv teb hais rau cov xub tuaj ib tug tias : “Npawg, kuv tsis tau ua tsis ncaj rau koj : wb tsis tau hais haum tias ib hnub ib lub txiaj nyiag no lod ? 
Txais koj tus nqi zog, koj cia li mus. Kuv xav muab rau tus tuaj tom qab no, ib yam li muab rau koj : kuv tsis muaj cai rho kuv tej nyiaj txiag raws kuv siab lod ? Los yog koj khib vim kuv siab zoo ?" 
Cov tuaj tom qab yuav tau ua ntej, hos cov ua ntej yuav tuaj tom qab zoo li no.