ZAJ NYEEM HNUB TIM 19 LUB 9 HLI 2020

LIS PIAM 24 CAIJ NRUAB XYOOS.
Zaj paj lug tseb nplej. (LK.8 : 4 – 15)
Thaum ntawd muaj tej pab neeg coob tuaj sis sau ua ke, thiab muaj neeg tuaj txhua lub nroog tuaj cuag Yes Xus. Ces Yes Xus ua paj lug hais li no : "Tus tseb nplej tawm mus tseb nws cov noob qoob. Thaum nws tseb, muaj ib co noob poob rau ntawm ntug kev. Luag tsuj cov noob ntawd, thiab noog ya saum ntuj los noj tas huv si lawm. Muaj ib co noob poob rau saum pob zeb, cov yub nplej hlob, tab sis cov yub cia li qhuav, vim av tsis noo. Muaj ib co noob poob rau hauv cov pos, cov yub nplej nrog pos hlob ua ke, tab sis pos laum nplej tuag tas. Muaj ib co noob poob rau hauv thaj av zoo, cov yub nplej hlob, cov nplej txi txiv txog pua lub." Yes Xus hais cov lus no tas, nws hais nrov nrov tias : "Leej twg muaj pob ntseg mloog, cia nws mloog !"
Yes Xus cov thwj tim nug nws saib zaj paj lug no lub ntsiab yog dab tsi. Yes Xus hais tias : "Ntuj pub kom nej paub tej txuj ci tob tob hauv Tswv Ntuj lub Ceeb Tsheej, tab sis rau luag tej, mas tsuas yog lus ua paj lug kom xwv lawv ntsia, los lawv tsis pom, lawv hnov, los lawv tsis to taub." 
Zaj paj lug ntawd lub ntsiab txhais li no : Cov noob, yog Tswv Ntuj Lo Lus. Cov noob uas poob ntawm ntug kev, yog cov uas tau hnov, tab sis dab phem tuaj rho Lo Lus tawm hauv lawv lub siab mus, kom lawv txhob ntseeg, thiab txhob tau txais kev cawm. Cov uas poob rau saum pob zeb, yog cov neeg uas thaum lawv hnov Lo Lus, lawv zoo siab hlo txais. Tab sis lawv tsis muaj cag, lawv tsuas ntseeg ib ntus xwb, lub caij sim lawv siab, lawv cia li tso tseg. Cov noob uas poob rau hauv hav pos, yog cov neeg uas tau hnov Lo Lus, tab sis thaum lawv taug lawv txoj kev, lub neej tej kev txhawj, tej nyiaj txiag, tej kev ntxias neeg lub siab lub cev laum Lo Lus, ces Lo Lus hlob tsis taus. Hos cov noob poob hauv thaj av zoo, yog cov uas tau hnov Lo Lus, lawv khaws Lo Lus rau hauv ib lub siab loj siab dav, ces lawv txi txiv vim lawv lub siab ruaj.