Zaj nyeem hnub tim 2 lub 11 hlis 2023 (Daily reflection)

ZAJ NYEEM HNUB TIM 2 LUB 11 HLIS, HNUB THOV NTUJ RAU TSOOM NEEG DUA NRA

COV LUS NYOB HAUV ZAM NTAWV MOO ZOO (Z 6: 37-40)

Kwv tij Hmoob, nag hmo peb ua hmoov hwm tsoom Leej Ntshiab, hnub no lub Koom Txoos cia peb thov Ntuj rau tsoom neeg dua nra los yog rau peb cov txheeb ze tau tso lub ntiaj teb no tseg lawm.

Thaum peb thov Ntuj rau cov dua nra mas yuav pab peb kom ras ntsoov txog txoj kev ntseeg, kev nyiam, thiab kev vam khom. Yog muaj lub siab ntseeg txog Tswv Ntuj tus tsim peb los rau lub ntiaj teb no, yog lub hauv paus xeeb peb thiab yog lub hau kev peb taug mus kom txog. Yog kom peb mus txog Tswv Ntuj tau mas peb thiaj tsum ua cov hauj lwm sib nyiam sib hlub xws li Huab Tais Yes Xus qhia thiab ua tus piv txwv rau peb. Yog kom peb vam khom tias Tswv Ntuj tsim tso tus neeg pheej xeeb rau Tswv Ntuj pov tseg raws li cov lus hnub no Huab Tais Yes Xus hais ua pov thawj tias “Kuv yuav tsis ntiab tus tuaj cuag kuv rau nraum zoov. Hnub kawg, kuv yuav tsa tus ntseeg txog kuv sawv rov los.”

Kwv tij Hmoob, nyob hauv peb cov neeg ntseeg Ntuj mas peb hais tias txoj kev tuag tsis yog qhov xaus hauv neeg txoj sia. Tiam sis txoj kev tuag yog lub rooj loog coj mus cuag txoj sia nyob mus li. Vim peb yog neeg mas peb thiaj tsis muaj zog tawm tsam tau dab phem kev ntxias, ces ntau zaus peb poob rau qhov txhaum, peb tau ua phem ua tsis xis Tswv Ntuj siab. Thaum peb tuag, ua ntej yuav tau mus nrog Tswv Ntuj nyob pem lub nras lom zem, peb thiaj tsum tau mus ntxhua mus yaug peb tus plig kom ntshiab kom huv tso. 

Thaum peb tuag lawd, peb ua tsis tau dab tsi lawm, peb tsuas vam txog Tswv Ntuj lub txiaj ntsim thiab cov lus thov ntawm cov kwv tij tseem ua neej nyob xwb. Yog li Koom Txoos thiaj cia hnub no ua hnub peb yuav sib txoos thov Ntuj pub txiaj ntsim thiab khuv leej peb cov neeg tau tso lub ntiaj teb no tseg. Peb tsis paub lawv tus ntsuj tus plig mus nyob qhov tawg lawm; puas yog saum ntuj, hauv teb chaws them txim, los yog hauv dab phem cov hluav taws.

Yam peb ua tau, yog tso siab rau Tswv Ntuj ua tus pab lawb, peb thiaj thov Ntuj rau lawv.

Nyob zoo sawv daws.