Zaj nyeem hnub tim 2 lub 8 hli 2023 (Daily reflection)1 aug vdo web

ZAJ NYEEM HNUB TIM 2 LUB 8 HLI, HNUB NCO TXOG LEEJ NTSHIAB ES XES NPIS OS
COV LUS NYOB HAUV MAS TAIS NTAWV MOO ZOO (MT 13: 44-46)

Kwv tij Hmoob sawv daws, Huab Tais Yes Xus hais tias Ntuj lub Ceeb Tsheej zoo li ib hub nyiaj faus rau hauv ib daim teb, Ntuj lub Ceeb Tsheej zoo li ib lub hlaws npliag dej zoo nkauj. Txhais tau tias Ntuj lub Ceeb Tsheej yog ib yam muaj txiaj ntsim thiab muaj nqis tshaj txhua yam. 
Thaum peb pom ib yam muaj nqis tshaj txhua yam, peb yuav ua li cas thiaj yuav tau yam ntawd los ua peb tug?
Puas yog peb cia li nyiag los ua peb tug? 
Yog peb nyiag ces peb tsuas yog tus tub sab xwb, peb yim muaj txhaum loj.
Huab Tais Yes Xus qhia tias “Thaum koj pom lub hub nyiaj nyob hauv daim teb twg, koj kav tsij muab koj lub cuab tam muag, coj cov nyiaj ntawd los yuav daim teb ntawd ua koj tug, mas lub hub nyiaj thiaj yuav yog koj li vim lub hub nyiaj nyob hauv koj daim teb, ces luag tej yuav hais tsis tau tias koj yog tub sab. Thaum koj pom ib lub hlaws npliag dej zoo nkauj, mas koj kav tsij maj zeeg mus muab koj lub cuab tam muag, ces koj tuaj yuav lub hlaws muaj nqis ntawd ua koj tug.”
Kwv tij, Ntuj lub Ceeb Tsheej zoo li ntawd. Ntuj lub Ceeb Tsheej yog yam muaj nqis tshaj plaws rau neeg. Yog peb xav tau mus nyob hauv Ntuj lub Ceeb Tsheej, mas Huab Tais Yes Xus hais tias “Koj tsum muab tag nrho koj lub cuab tam tso pov tseg, ces koj xaiv Ntuj lub Ceeb Tsheej. Koj txhob nyiag Ntuj lub Ceeb Tsheej, vim koj yuav nyiag tsis tau.”
Huab Tais Yes Xus hais tas tas lus li ntawd tiag, tsis yog kom peb ua ob siab ntshaw yuav Ntuj lub Ceeb Tsheej, thiab kuj ntshai plam peb lub cuab tam hauv ntiaj teb no.
Hnub no, peb puas kam xaiv Tswv Ntuj lub Ceeb Tsheej los ua peb lub cuab tam, peb puas saib Tswv Ntuj lub Ceeb Tsheej muaj nqis dua peb tej nyiaj txiag, peb tej kev tau zoo nyob hauv lub ntiaj teb no. 
Peb yuav thov Huab Tais Yes Xus pab peb, kom peb txawj tso lub cuab tam tsis ruaj, lub cuab tam txawj lwj pov tseg, tig los yuav lub cuab tam nyob ruaj nreb khov kho mus li uas yog Tswv Ntuj lub Ceeb Tsheej.
Nyob zoo sawv daws.