Zaj nyeem hnub tim 2 lub 8 hlis 2023 (Daily reflection)

ZAJ NYEEM HNUB TIM 2 LUB 9 HLIS, HNUB XYA LUB LIS PIAM 21 CAIJ NYOB NRUAB XYOO

COV LUS NYOB HAUV MAS TAIS NTAWV MOO ZOO (MT 25: 14-30)

Cov kws tij Hmoob, nyob hauv lub Moo Zoo hnub no, tus tub txib twg thiaj yog tus uas lawv tus tswv nyiam tshaj? Puas yog tus tau txais tsib nras nyiaj, los yog tus tau txais ob nras nyiaj, los yuav yog tus tau txais ib nras nyiaj?

Tus tswv yeej nyiam lawv peb leeg sib luag zos, thiab tus tswv yeej paub lawv rab peev xwm zoo, mas tus tswv thiaj muab nyiaj rau lawv coj mus ntxeev tsis sib npaug.

Tswv Ntuj tsim peb los, nws nyiam peb nws hlub peb ib yam, thiab Tswv Ntuj kuj paub peb zoo; yog li Tswv Ntuj thiaj pub lub neej rau peb tsis zoo tib yam.

Kwv tij, Huab Tais Yes Xus hais tias nyob hauv lawv peb leeg ntawd, muaj ob leeg tau coj cov nras nyiaj mus ntxeev ces tau ib co paj ntxiv, tab sis muaj ib tug nws coj mus faus cia, ces nws nras nyiaj tsis tawg taus paj.

Kwv tij Hmoob, peb muab tig los piv rau peb lub neej xws li niam txiv muab ib pob nyiaj ua peev rau lawv cov tub mus ua luam. Tej tus ua luam nce tes nws muaj nyiaj ntxiv tuaj, mas niam txiv nrog nws zoo siab; tej tus ua luam poob peev nyiaj ploj tas, niam txiv yws yws tab sis kuj hais lus nplij siab rau nws tias ‘tsis ua cas, mam nrhiav lwm yam ua’. Tab sis tus tub uas tsis quav ntsej ua hauj lwm li, mas niam txiv kawg tu siab rau nws xwb xwb.

Peb rov saib cov lus hauv lub Moo Zoo, Huab Tais Yes Xus hais tias ob tug tub txib coj nras nyiaj mus ntxeev yog ‘tub txib siab zoo siab ncaj’. Lo lus no yog lo peb yuav coj los xav nyob hauv hnub no.

Nyob hauv txoj kev ntseeg Ntuj, tus neeg zoo thiab siab ncaj, nws yuav ua neej nyob hauv txoj kev nyiam kev hlub; nws yuav muab Tswv Ntuj kev nyiam mus hlub luag tej ob cag, nws yuav pab lawv, zam rau sawv daws; nws yuav rau siab ntso leg nws txoj hauj lwm Tswv Ntuj pub rau nws, nws yuav muab lub tswv yim thiab rab peev xwm Tswv Ntuj pub rau nws mus ua qhov zoo rau sawv daws.

Huab Tais Yes Xus xav kom peb ua zoo li ntawd.

Nyob zoo sawv daws.