ZAJ NYEEM HNUB TIM 2 LUB 9 HLI 2020

LIS PIAM 22 CAIJ NRUAB XYOOS
Yes Xus kho ntau leej neeg mob thiab Yes Xus tso Kas Fas Naus twj ywm tseg. (LK.4 : 38 – 44)
Yes Xus tawm hauv lub tsev txoos, nws mus hauv Xis Moos lub tsev. Thaum ntawd, Xis Moos niam tais mob kub cev heev. Lawv thov komYes Xus saib Xis Moos niam tais. Yes Xus khoov mus saib tus niam tais, nws yuam tus mob kub cev, ces tus mob tso plhuav niam tais tseg. Niam tais sawv tsees tam sis ntawd. Nws pib tsob hwb lawv.
Thaum lub hnub poob qho, cov uas muaj neeg raug tej hom mob, sawv daws coj lawv cov neeg mob tuaj rau Yes Xus. Ces Yes Xus tsa tes rau saum lawv ib leeg zuj zus, nws kho sawv daws zoo tas huv si. Ib co dab phem kuj tawm hauv coob leej mus, dab phem qw qw tias : "Koj yog Tswv Ntuj Leej Tub." 
Tab sis Yes Xus cem lawv, nws txwv tsis pub lawv hais lus, vim lawv paub tias nws yog Leej Pleev. 
Thaum kaj ntug, Yes Xus tawm mus rau ib qho chaw tsis muaj neeg. Tsoom sid nrhiav nws, lawv tuaj txog ntawm nws, lawv xav cheem Yes Xus kom txhob mus deb ntawm lawv.Tab sis Yes Xus hais rau lawv tias : "Kuv yuav tsum tshaj lub Moo Zoo hais txog Tswv Ntuj lub Ceeb Tsheej rau lwm cov nroog thiab. Yog vim qhov ntawd, Ntuj thiaj xa kuv tuaj." 
Ces Yes Xus tshaj lus rau hauv cov tsev txoos nyob Yus Das teb.