Zaj nyeem hnub tim 20 lub 10 hli 2023 (Daily reflection)

ZAJ NYEEM HNUB TIM 20 LUB 10 HLI, HNUB RAU LUB LIS PIAM 28 CAIJ NYOB NRUAB XYOO

COV LUS NYOB HAUV LUS KAS NTAWV MOO ZOO (LK 12: 1-7)

Kwv tij Hmoob sawv daws, Huab Tais Yes Xus hais tias “Nej ceev faj rau cov poov xab Fas Lis Xais, rau lawv txoj kev ua zoo sab nraud. Tsis muaj ib yam zais ntshis uas yuav tsis qhib tawm los, tsis muaj ib yam npog uas yuav tsis muaj neeg paub.”

Lo lus no yog li cas? Yog Huab Tais Yes Xus ntuas peb sawv daws kom txhob ua neeg zoo sab nraud tab sis hauv nruab siab xav phem, txhob ua zoo kom luag tej qhuas tab sis hauv lub siab mas tsis nyiam qhov yus tab tom ua ntawd.

Kwv tij, txawm tias peb txhob txwm ua zoo ntawm luag tej ob cag, los muaj ib hnub sawv daws yuav pom tias tej ntawd yog peb lam ua xwb. Txawm luag tsis pom, tsis kav muaj Tswv Ntuj pom. 

Cov kwv tij, yog peb sawv daws rov tig mus xav txog puag thaum peb tseem yau, tseem zoo li ib daim ntaub dawb tsis txawj ua txhaum. Muaj ib hnub peb nrog peb tus kwv los tus muam ua si, peb tsis ceev faj ua rau ib lub tais poob tawg.

Thaum peb niam los pom, nws yuav nug tias leej twg ua. Thaum ntawd peb ntshai, peb tsis lees, tsis kav peb tseem muab liam rau peb tus kwv los tus muam ris lub txim thiab.

Nej xav saib, peb lub siab puas yuav kaj? Peb yeej ntshai tsam qhov tseeb tawm tuaj puas yog?

Tos peb ntshai, vim tias nyob tob tob hauv peb mas muaj Tswv Ntuj nrog peb nyob, Tswv Ntuj lub suab hais rau peb tias peb tab tom ua tsis yog, tab sis vim lub keeb txhaum nyob ntxaws hauv peb, mas peb thiaj tiv Tswv Ntuj lub suab ntawd.

Cov kwv tij, thaum peb tsis lees thiab muab liam rau lwm tus, mas yog cov poov xwb Fas Lis Xais pib ntsu tuaj nyob hauv peb, yog lub tswv yim zoo sab nraud tab tom nrhau cag nyob hauv peb. Tab sis hnub ntawd, peb lees lub txim tias yog peb ua, mas zo li peb mloog Tswv Ntuj lub suab, peb tsis pub txoj kev phem poob rau hauv peb.

Kwv tij, hnub twg lub tswv yim phem ntsu tuaj lawd mas ceeb laj tua tau, yog li hnub no Huab Tais Yes Xus thiaj hais kom peb ceev faj.

Cov tshuaj yuav tua tau lub poov xab ua neeg zoo sab nraud kawg yog mloog Tswv Ntuj Lus thiab coj lub neej nyob hauv txoj kev nyiam; nyiam Tswv Ntuj thiab nyiam lwm tus xws li Huab Tais Yes Xus tau ua piv txwv rau peb pom.

Nyob zoo sawv daws.