Zaj nyeem hnub tim 20 lub 11 hlis 2023 (Daily reflection)

ZAJ NYEEM HNUB TIM 20 LUB 11 HLIS, HNUB OB LUB LIS PIAM 33 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 18: 35-43)

Kwv tij Hmoob sawv daws, peb mloog lub Moo Zoo hnub no tas mas peb yuav ntuas siab zoo li cas? Yog tias tus neeg dig muag hauv lub Moo Zoo hnub no yog peb, mas peb puas yuav muaj ib lub siab ntseeg xws li nws thiab peb puas yuav hu kom Huab Tais Yes Xus khuv leej peb?
Cov kwv tij, yog peb ob lub qhov muag dig tas tsis pom dab tsi li, peb hnov luag tej cav txog Huab Tais Yes Xus tias yog Das Vis Leej Tub, mas kawg peb yuav ntseeg cov lus lawv hais thiab peb kuj yuav muaj lub siab ntseeg li ntawd tiag.
Kwv tij Hmoob, ua cas thiaj hais tias ‘ntseeg cov lus lawv hais’ thiab ho yuav hais tias ‘muaj lub siab ntseeg’?
Tus neeg uas hnov luag tej hais tas, ces nws ntseeg, mas nws tsuas yog lees txais cov lus ntawd tias muaj li ntawd tiag; tab sis tej zaus nws kuj yuav tsis ua raws li cov lus ntawd.
Tus neeg uas hnov luag tej hais tas, nws lub siab ntseeg mas nws yuav ua raws li qhov nws ntseeg. Lub Koom Txoos hais tias yog nws yuav ua raws li Tswv Ntuj tau qhia rau nws.
Yog tus dig muag tsis muaj lub siab ntseeg, mas nws yuav tsis tsa suab hu nrov nrov kom Huab Tais Yes Xus khuv leej nws! 
Peb pom tias tus dig muag tsa suab hu Huab Tais Yes Xus tas zog, txawm tias luag tej cem kom nws ua twj ywm, los nws tsis tso tseg. Nws lub siab ntseeg tiag!
Cov kwv tij, yog tus dig muag ntawd yog peb, mas nyaj peb kuj yuav ua zoo li nws.
Kwv tij, niaj hnub no peb qhov muag yeej dig xws li tus dig muag no thiab. Huab Tais Yes Xus niaj hnub nyob nrog peb, tsis kav peb ntsia tsis pom, mas niaj hnub peb thiaj tsis txawj hlub cov neeg txom nyem, cov quaj ntsuag; peb thiaj tsis txawj nyiam tus ntxub peb.
Kwv tij Hmoob, xav kom peb sawv daws ua zoo li tus dig muag hauv lub Moo Zoo hnub no, xav kom peb sawv daws muaj lub siab ntseeg txog Huab Tais Yes Xus zoo li tus dig muag no tau hnov ces nws muaj lub siab ntseeg, xav kom peb sawv daws thov Huab Tais Yes Xus khuv leej peb, pab qhib peb lub qhov muag kom pom kev; kom peb tau pom Huab Tais Yes Xus nyob hauv cov neeg nyob puag ncig peb, kom Huab Tais Yes Xus qhib peb lub siab mas peb thiaj yuav txais tau Huab Tais Ntuj kev hlub peb, ces peb thiaj yuav txawj nyiam sawv daws.
Nyob zoo sawv daws.