Zaj nyeem hnub tim 20 lub 7 hli 2023 (Daily reflection)

ZAJ NYEEM HNUB TIM 20 LUB 7 HLI, HNUB NCO TXOG LEEJ NTSHIAB AS POS LIS NAS LIS
COV LUS NYOB HAUV MAS TAIS NTAWV MOO ZOO (MT 11: 28-30)

Kwv tij Hmoob, nyob hauv Huab Tais Yes Xus lub siab, nws xub nco txog cov neeg raug txom nyem ua ntej lwm tus, Huab Tais Yes Xus thiaj hais rau lawv tias “Tas nej sawv daws uas nej khwv, thiab ris nra hnyav, nej tuaj cuag kuv mog.”
Txoj kev raug txom nyem yog lub nras neeg kwv; tej tus ris lub nra sib, tej tus kuj ris lub nra hnyav. Sawv daws ib leeg muaj ib lub nra, yog li kuv yuav pab koj ris tsis tau, koj los kuj yuav tsis xyeej pab kuv ris.
Yog li mas kwv tij Hmoob, thaum peb kev txom nyem tuaj nphav peb, raug peb ntawd, peb puas nco txog Huab Tais Yes Xus, peb puas mloog Huab Tais Yes Xus hais lus rau peb.
Kwv tij, yog tias peb txo peb lub nra, peb muab sij hawm rau nrog Huab Tais Yes Xus tham, mloog Huab Tais Yes Xus cov lus. Thaum ntawd, peb lub siab yuav kaj tuaj, ces peb yuav rov muaj zog ris peb lub nra mus ntxiv.
Huab Tais Yes Xus hais ntxiv tias “Nej txais kuv tus quab, nej kawm ntawm kuv mog, vim kuv siab zoo, kuv tsis muab hlob, nej tus plig yuav nrhiav tau chaw so los siav.”
Kwv tij Hmoob, thaum cov neeg ua liaj lawv tawm mus laij liag, lawv yuav muab tus quab tso rau ntawm tus nyuj los tus twm caj dab, ces muab rab khais khi rau mas thaum tus twm mus kev thiaj yuav laij tau teb. Los yog thaum nruab tsheb rau nyuj los twm thaum nra, kuj yuav tau muab tus quab nruab thiab thiaj yuav thauj tau. Muab piv rau peb tib neeg, thaum peb yuav ris ntau lub nras, peb yuav tau siv tus pas kwv los kwv thiaj yuav ris tas. Thaum ntawd, peb kuj yuav xaiv tus pas kwv sib sib thiaj yuav tsis sab peb, puas yog?
Hnub no, Huab Tais Yes Xus thiaj hais tias nws yog tus quab los yog tus pas kwv sib kha ntawd.
Huab Tais Yes Xus tus quab yog ‘lub siab zoo siab ntev’, thiab ‘lub siab tsis muab hlob’.
Yog li thaum peb raug kev txom nyem, peb so ib me ntsis nrog Huab Tais Yes Xus tham, peb yuav ua ‘siab zoo siab ntev’ thiab ‘ua lub siab tsis muab hlob’ mas peb tus plig thiaj yuav tau so, thiaj yuav rov muaj zog tuaj.
Nyob zoo sawv daws.