Zaj nyeem hnub tim 21 lub 11 hlis 2023 (Daily reflection)

ZAJ NYEEM HNUB TIM 21 LUB 11 HLIS, HNUB NCO TXOG CEV MAB LIAB HAUV LUB TUAM TSEV TEEV NTUJ
COV LUS NYOB HAUV LUS KAS NTAWV MOO ZOO (LK 19: 1-10)

Kwv tij Hmoob sawv daws, hnub no peb tau hnov ib zag zoo ntuas peb kawg, yog hais txog tus nom sau se hu ua Ntxas Kais. Hnub no peb hnov tias nws yog ib tug neeg qig taub, mas nws thiaj nce mus nyob saum tsob ntoo kom tau pom Huab Tais Yes Xus. Thiab peb tseem paub ntxiv tias Ntxas Kais hloov siab tshiab tig los ua ib tug neeg hlub sawv daws.
Cov kwv tij, cov Yus Das tsis nyiam fim cov sau se vim lawv saib cov neeg ua hauj lwm sau se yog neeg muaj txhaum. Yog li mas tej zaum nyob hauv lub nroog Yes Lis Kos ntawd, yuav tsis muaj tus twg nyiam Ntxas Kais. 
Muaj ib yam ntxwv, Ntxas Kais tseem yog ib tug nom sau se thiab, piv li nws kuj yog neeg muaj hwj chim me ntsis. Tab sis kuj muaj ib yam txaus rau sawv daws luag Ntxas Kais mas nws yog neeg qig taub.
Ntxas Kais hnov tias hnub no Huab Tais Yes Xus tuaj txog lub nroog Yes Lis Kos lawm, nws kuj tau hnov sawv daws cav txog Huab Tais Yes Xus cov hauj lwm thiab, yog li hnub no nws thiaj xav pom saib Huab Tais Yes Xus yog ib tug neeg zoo li cas tiag. Ntxas Kais dhia huas luag ntej kom tau nyob ua ntej sawv daws, tab sis vim nws qig taub tes taw luv mas nws dhia tsis yeej luag, nws poob qab. Ntxas Kais pom tias nyob ntawd muaj ib tsob ntoo, nws thiaj nce mus zaum saud.
Kwv tij, nej xav saib, yog sawv daws pom ib tug nom sawv daws ntxub thiab tseem teem taub li ntawd nce mus nyob saum ib tsob ntoo, mas sawv daws yuav xav li cas? Sawv daws yuav thuam twj ywm hauv siab tias ua cas niag nom ntawd yuav ua tau txaus luag ua luaj, nws pom xeeb yog ib tug nom tsis kav nws yuav ua li ib tug me nyuam yaus tsis paub tab zoo li ntawd. Nyob ntawm nej mas nej puas yuav xav li ntawd?
Tab sis Huab Tais Yes Xus tsis xav li, Huab Tais Yes Xus pom hauv neeg nruab siab. Huab Tais Yes Xus qhuas txog yam Ntxas Kais tau ua. 
Tus neeg ntshaw pom Huab Tais Yes Xus, mas nws yuav ua tas txhua yam yuav ua tau kom nws tau pom; nws yeem txo lub hwj chim pov tseg los ua ib tug neeg me me li cov me nyuam, nws xav ntsib thiab pom Huab Tais Yes Xus tshaj yeem raug luag thuam thiab saib tsis tau.
Cov kwv tij Hmoob, hnub no peb puas yuav ua zoo li ntawd, peb puas yuav txo peb lub hwj chim tseg, peb puas yuav xaiv Huab Tais Yes Xus ua ntej txhua yam. Yog peb ua lo Ntxas Kais ua, mas hnub no Huab Tais Yes Xus yuav hais rau peb tias “Hnub no kuv yuav tsum mus hauv koj tsev.” 
Nyob zoo sawv daws.