Zaj nyeem hnub tim 21 lub 7 hli 2023 (Daily reflection)

ZAJ NYEEM HNUB TIM 21 LUB 7 HLI, HNUB NCO TXOG LEEJ NTSHIAB LOS LEES
COV LUS NYOB HAUV MAS TAIS NTAWV MOO ZOO (MT 12: 1-8)

Cov kwv tij Hmoob, cov Fas Lis Xais yog pab neeg paub Mais Xes txoj cai zoo thiab lawv xav kom sawv daws coj Mais Xes txoj cai kom nruj, mas thaum lawv pom Huab Tais Yes Xus cov thwj tim de tej hnab nplej los noj nyob hauv hnub Xas Npas Tos los yog hnub caiv, lawv saib tias yog cov thwj tim tau ua tsis haum txoj cai lawm, lawv thiaj hais rau Huab Tais Yes Xus tias “Yes Xus, koj tsis paub tias koj cov thwj tim ua tej yam txwv tsis puab ua nyob hauv hnub caiv no lod?”
Huab Tais Yes Xus thiaj hais rau cov Fas Lis Xais tias “Ua cas nej hais li ntawd, nej twb paub tias thaum Das Vis thiab nws cov npawg tshaib plab, lawv twb muab cov ncuav mov txi Ntuj uas pub rau cov Leej Choj noj xwb, coj los sib faib noj; puas yog lawv tsis tau ua tej yam txwv tsis pub ua mas! Lawv ua li ntawd vim lawv pom tias neeg txoj sia muaj nqes dua neeg tej kab ke ib txwm coj, nej hais puas yog?”
Huab Tais Yes Xus tseem hais ntxiv tias “Nej hais tias tsum caiv hnub Xas Npas Tos, tab sis ua cas cov Leej Choj hauv lub Tuam Tsev Teev Ntuj ho tsis caiv.” 
Huab Tais Yes Xus kuj muab tus Yaj Saub His Xais cov lus los hais rau lawv tias “Tswv Ntuj kuj tau hais rau tus Yaj Saub tias ‘qhov kuv xav yuav; yog txoj kev khuv leej, tsis yog cov txim nej coj tuaj txi Ntuj’. Lo lus no nej yuav muab txhais li cas, puas yog Tswv Ntuj nyiam neeg lub siab khuv leej dua, los yog Tswv Ntuj nyiam tej ncuav mov los tej tsiaj nej muab tua txi Tswv Ntuj dua!”
Huab Tais Yes Xus cov lus no ua rau lawv tsis paub teb dab tsi ntxiv. Ces Huab Tais Yes Xus thiaj qhia lawv tias “Neeg Leej Tub yog tus tswv kav hnub Xas Npas Tos thiab Neeg Leej Tub yog tus loj dua lub Tuam Tsev Teev Ntuj.”
Cov kwv tij, hnub no Huab Tais Yes Xus xav qhia peb kom txhob muab neeg tej cai coj los theem kev ua cov hauj lwm khuv leej neeg, txhob muab neeg tej kab ke los saib loj dhau txoj kev nyiam. 
Kwv tij, Neeg Leej Tub yog Huab Tais Yes Xus, Huab Tais Yes Xus yog Tswv Ntuj, Tswv Ntuj yog kev nyiam; yog li mas kev sib nyiam sib hlub thiaj loj dua hnub Xas Npas Tos thiab lub Tuam Tsev Teev Ntuj.
Nyob zoo sawv daws.