Zaj nyeem hnub tim 21 lub 8 hli 2023 (Daily reflection)

ZAJ NYEEM HNUB TIM 21 LUB 8 HLI, HNUB NCO TXOG LEEJ NTSHIAB PIS YUS KAUM
COV LUS NYOB HAUV MAS TAIS NTAWV MOO ZOO (MT 19: 16-22)

Kwv tij Hmoob sawv daws, nyob hauv lub Moo Zoo peb hnov tus neeg tuaj nug Huab Tais Yes Xus tias nws yuav ua li cas thiaj yuav yog tus tau txoj sia nyob mus li. Huab Tais Yes Xus hais rau nws tias tus tus yuav tau txoj sia nyob mus li yog neeg ‘zoo’.
Tus neeg no qhia tias ib txwm los, nws ua raws nraim Huab Tais 10 Lo Lus Qhia tsis nruam ib zaug li, qhov ntawd puas tau txaus.
Huab Tais Yes Xus thiaj hais rau nws tias tshuav ib qho thiab, yog nws mus muab nws lub cuab tam muag faib rau cov neeg pluag kom tas.
Kwv tij, ua cas tus neeg no twb coj nraim Huab Tais Txoj Cai, tseem tsis txaus yuav tau txais txoj sia nyob mus li thiab. Yog peb muab xav mas tus neeg nplua nuj muaj nyiaj ntau, nws yuav qee nws tej nyiaj mus pub lwm tus los nws yeej tsis kub ntxhov dab tsi; tus neeg muaj txhua yam lawm, nws yeej yuav tsis ntshaw txeeb luag tug los ua nws li. Yog li peb thiaj pom cov neeg muaj lawv kheev tsim koob hmoov tas zog. Lawv tsim ntau dua cov neeg txom nyem.
Kwv tij Hmoob sawv daws, Huab Tais Yes Xus hais tias ‘Koj rov mus muab txhua txhia yam uas yog koj tug muag, muab pub rau cov pluag.”
Lo lus no yog Haib Tais Yes Xus qhia tias tus yuav tau txoj sia nyob mus li mas nws tsum pub yam tseem ceeb tshaj plaws hauv nws lub neej rau lwm tus, tsis yog qee ib qhov rau lawv, yog muab tag nrho rau lawv.
Kwv tij, txoj kev taug mus kom tau txoj sia nyob mus li mas tsis yooj yim tiag tiag. Yog peb xaiv raws Huab Tais Yes Xus, peb yuav tau nrauj dab phem kev haub ntxias; yog peb xaiv ua qhov zoo, mas peb yuav tau khiav deb kev ua phem; yog peb nyiam tus neeg twg, peb yuav tau muab tag nrho peb txoj sia los pub rau nws; yog peb txiav siab ua Ntuj kev cai, mas peb yuav tau tso txhua yam dab pov tseg kom tas.
Kwv tij, kev ua zoo mas yooj yim, tab sis kev nrauj yus tus kheej mas tsis yooj yim kiag li. Yog li mas peb yuav tau thov Leej Ntuj Plig Ntshiab tuaj kaj peb lub siab, thov Leej Ntuj Plig Ntshiab tuaj ntxiv zog rau peb tsis tseg mog.
Nyob zoo sawv daws.