Zaj nyeem hnub tim 22 lub 6 hlis 2023 (Daily reflection)

ZAJ NYEEM HNUB TIM 22 LUB 6 HLIS, HNUB NCO TXOG LEEJ NTSHIAB POS LIS NUS
COV LUS NYOB HAUV MAS TAIS NTAWV MOO ZOO (MT 6: 7-15)

Cov kwv tij, lub Moo Zoo hnub no mas yog hais txog kev teev Ntuj. 
‘Teev Ntuj’ yog tsa peb lub siab kom siab mus cuag Tswv Ntuj, los yog thov yam zoo zoo ntawm Tswv Ntuj.
 Thaum cov thwj tim hais kom Huab Tais Yes Xus qhia lawv teev Ntuj, mas Huab Tais Yes Xus hais tias “Thaum nej teev Ntuj, nej txhob ntuas mus ntuas los ntau ntau. Nej yuav xub cav txog Tswv Ntuj zoo li no tias ‘Peb Txiv nyob saum ntuj, koj lub npe ntshiab nto moo lug, koj lub Ceeb Tsheej los txog’, ces nej yuav thov kom muaj raws li Tswv Ntuj siab nyiam tias ‘kom muaj raws li koj nyiam nyob ntiaj teb no li nyob saum ntuj’, tag mas nej mam thov yam nej xav tau tias ‘thov koj pub mov txaus peb noj hnub no, koj zam txhaum rau peb zoo li peb zam rau luag, koj txhob tso peb rau kev ntxias, koj npo peb dim ntawm kev phem’.”
Kwv tij, lub Koom Txoos kuj tau qhia peb sawv daws tias thaum peb teev Ntuj mas peb yuav ua raws 4 yam no: cav txog Tswv Ntuj, tu siab rau cov txhaum peb tau ua, ua Tswv Ntuj tsaug, thiab yam kawg yog thov Tswv Ntuj pub txiaj ntsim rau peb.
Nyob zoo sawv daws.