Zaj nyeem hnub tim 22 lub 8 hli 2023 (Daily reflection)

ZAJ NYEEM HNUB TIM 22 LUB 8 HLI, HNUB NCO TXOG MAB LIAB UA POJ HUAB TAIS
COV LUS NYOB HAUV MAS TAIS NTAWV MOO ZOO (MT 19: 23-30)

Cov kwv tij Hmoob, lub Moo Zoo nag hmo peb hais tias tus neeg tuaj nug Huab Tais Yes Xus tias nws ua raws Huab Tais txoj cai huv si lawm, nws yuav ua li cas ntxiv thiaj yuav tau txoj sia nyob mus li, ces Huab Tais Yes Xus hais kom nws rov mus muab nws lub cuab tam muag, muab cov nyiaj los pub rau cov neeg pluag, thiab nws raws Huab Tais Yes Xus mus mas nws thiaj yuav tau txoj sia nyob mus li.
Tus neeg ntawd hnov li ntawd, nws tu siab thiab nws rov mus tsev vim nws tsis muaj cuab kav yuav nrauj tau nws lub cuab tam, nws yuav pub tas nws lub cuab tam nws muaj rau lwm tus tsis tau.
Kwv tij, hnub no Huab Tais Yes Xus thiaj hais rau cov thwj tim tias “Tus neeg nplua nuj ceeb laj nkag mus hauv Ntuj lub Ceeb Tsheej.”
Ua cas Huab Tais Yes Xus thiaj hais zoo li ntawd, vim tias kev nplua nuj yuav ua rau peb lub siab cuaj khaum. Muab xav saib, yog peb hais kom tus neeg muaj ib puas thiab tus muaj ib txhiab, nkawd tso nkawd cov nyiaj kom tas rau hauv lub hnab nyiaj, tus twg yuav khuv xim dua. Muaj tsawg tsawg tus neeg muaj ib puas yuav khuv xim dua tus muaj ib txhiab.
Kev raws Huab Tais Yes Xus qab kuj yuav zoo li ntawd, tus neeg cuaj khaum nws lub neej, nws khuv xim lub sij hawm muab rau Huab Tais Yes Xus, mas nws ceeb laj raws tau Huab Tais Yes Xus qab. Yog li mas cov kwv tij Hmoob, peb yuav ua neeg pluag, tsis txhob khuv xim peb lub sij hawm, tsis txhob khuv xim peb lub zog ua cov hauj lwm sib nyiam sib hlub, txhob khuv xim peb lub tswv yim kawm Huab Tais Yes Xus cov lus qhia.
Nyob zoo sawv daws.