Zaj nyeem hnub tim 23 lub 10 hli 2023 (Daily reflection)

ZAJ NYEEM HNUB TIM 23 LUB 10 HLI, HNUB NCO TXOG LEEJ NTSHIAB ZAM KAS PIS TAS NOS

COV LUS NYOB HAUV LUS KAS NTAWV MOO ZOO (LK 12: 13-21)

Kwv tij Hmoob sawv daws, hnub no Huab Tais Yes Xus hais ib zaj paj lug ntuas peb kom txhob muab txoj sia khi rau lub siab ntshaw ntiaj teb lub cuab tam, tab sis kom peb muab txoj sia khi rau kev ntshaw ua tus neeg nplua nuj nyob saum Ntuj lub Ceeb Tsheej; Huab Tais Yes Xus thiaj hais tias “Nej ceev faj, nej yuav txuag kom nej txhob ntshaw.”

Kwv tij, lub neej nyob ntiaj teb no piv tau li peb tawm rooj mus kev deb, muaj ntau yam peb ntsib tom tej tog kev, muaj ntau yam ntxias peb kom ntshaw mas peb thiaj yuav tej ntawd ua peb tug. Peb muab lub siab dai dhuam rau tej yam peb ntshaw ntawd ntau dhau, ces ua rau peb ceeb laj mus kom txog chaw.

Nyob hauv lub neej raws Huab Tais Yes Xus qab, mas peb lub siab ntseeg yog yam tseem ceeb tshaj plaws. Muaj ntau yam rub peb lub siab kom fav xeeb rau Tswv Ntuj, yam ntawd yog ntiaj teb lub cuab tam; tshwj xeeb mas yog lub hwj chim, suab npe, nyiaj txiag. Tej no yuav rub peb lub siab kom nyob deb Tswv Ntuj, tej no yuav looj koov peb ua rau tsis nco txog Tswv Ntuj, mas ntev thiab ntev mus peb thiaj tsis muaj lub siab ntseeg.

Cov kwv tij, ua cas peb tsis muab lub siab ntshaw ntawd, los ntshaw lub neej nplua nuj nyob saum Ntuj Ceeb Tsheej, ua cas peb tsis nrhiav lub cuab tam nyob mus li saum Ntuj lub Ceeb Tsheej.

Kwv tij, Tswv Ntuj tsis tau txwv kom peb txhob nrhiav nyiaj txiag, txhob ua lub neej nplua nuj nyob hauv lub ntiaj teb no; qhov Tswv Ntuj xav hais rau peb mas yog peb txhob muab nyiaj txiag saib hlob, txhob muab kev nplua nuj muaj cuab tam ntau saib tseem ceeb dua kev nrhiav Tswv Ntuj, vim txhua yam ntawd yog Tswv Ntuj ua tus pub raws li Tswv Ntuj pom zoo pub.

Tswv Ntuj pub nyiaj txiag, lub neej muaj noj muaj hnav rau peb, yog kom peb tau coj mus pub rau cov neeg txom nyem tsis muaj noj tsis muaj hnav, cov neeg raug kev tshaib nqhis. Tsis yog kom peb muab puag cia ua peb ntiag tug. Yog li mas Huab Tais Yes Xus thiaj hais cov lus no rau tus neeg muab tas nws lub siab khi rau nws cov cuab tam, nws tsis kam pub rau luag tej tias “Niam ruam, hmo no Ntuj yuav coj koj tus ntsuj plig rov qab. Tej yam koj npaj tau yuav yog leej twg tug?”

Nyob zoo sawv daws.