Zaj nyeem hnub tim 23 lub 11 hlis 2023 (Daily reflection)

ZAJ NYEEM HNUB TIM 23 LUB 11 HLIS, HNUB NCO TXOG LEEJ NTSHIAB VAJ QHIA NKES MEES IB THIAB LEEJ NTSHIAB KOS LOOS NPAS
COV LUS NYOB HAUV LUS KAS NTAWV MOO ZOO (LK 19: 41-44)

Kwv tij Hmoob, Huab Tais Yes Xus sawv kev ntawm Yes Lis Kos mus ntxiv li 20 ncua kev ces nws tuaj txog lub zos Npes Tas Nias. Huab Tais Yes Xus nyob ntawd ntsia lub tsheej Yes Lus Xas Les, mas Huab Tais Yes Xus nco txog cov lus hauv zaj Nkauj Paj Nruag hais tias “Peb mus pem Huab Tais tsev, kuv zoo siab hlo. Yes Lus Xas Les, peb ko taw nres ntawm koj cov qhov rooj. PVim kuv nyiam kuv cov kwv tij thiab cov phooj ywg, kuv hais tias ‘thov kom kev thaj yeeb nyob hauv koj’. Vim kuv nyiam peb tus Huab Tais Tswv Ntuj lub tsev, kuv thov kom koj tau nyob kaj lug.”
Huab Tais Yes Xus nco txog zaj Nkauj Paj Nruag no ces nws quaj vim cov neeg hauv Yes Lus Xas Les tsis kam txais Huab Tais Yes Xus, lawv tsis xaiv kev thaj yeeb, qhov lawv xaiv yog kev sib tawg, kev sib tiv. Yog tias hnub ntawd lawv yuav Huab Tais Yes Xus cov lus, lawv hloov siab tshiab, mas lub tsheej Yes Lus Xas Les yuav nyob mus li, yuav ua lub tsheej nyob thaj yeeb. 
Cov kwv tij, yog peb muab xav tias lub tsheej Yes Lus Xas Les yog peb, mas yuav zoo li cas?
Niaj hnub no Huab Tais Yes Xus hu peb kom tig los yuav lub siab tshiab, mloog Huab Tais Yes Xus thiab ua raws li Huab Tais Yes Xus qhia; yog sib nyiam sib hlub.
Hnub no peb puas yuav xaiv txoj kev Huab Tais Yes Xus taw rau peb taug, los peb yuav ua neeg twm xeeb tsis kam yuav Huab Tais Yes Xus hais.
Peb paub tias tom qab Huab Tais Yes Xus tuag thiab sawv rov los, nws nce mus saum ntuj lawm, cov Los Mas tuaj lwg lub tsheej Yes Lus Xas Les thiab muab rhuav pov tseg. Tsis muaj Huab Tais Ntuj lub tsheej ntxiv lawm!
Kwv tij, nyob hauv peb mas kuj yuav zoo li ntawd. Yog hnub no peb xaiv Yes Xus ua peb tus Huab Tais, peb raws nws qab mas peb yuav tau ntsib kev thaj yeeb; tab sis hnub twg peb tso Huab Tais Yes Xus pov tseg, peb tiv Huab Tais Yes Xus mas muaj ib hnub peb kuj yuav raug rhuav pov tseg thiab.
Peb yuav ntsib kev thaj yeeb nyob hauv kev sis nyiam sis hlub. Huab Tais Yes Xus yog Tswv Ntuj kev nyiam thiab kev hlub peb. Peb nyob hauv Huab Tais Yes Xus, mas peb thiaj nyob hauv kev sis nyiam sis hlub, peb nyob hauv kev thaj yeeb.
Nyob zoo sawv daws.