Zaj nyeem hnub tim 23 lub 6 hlis 2023 (Daily reflection)

ZAJ NYEEM HNUB TIM 23 LUB 6 HLIS, HNUB RAU LUB LIS PIAM 11 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 6: 19-23)

Huab Tais Yes Xus hais tias “Koj txhab cuab tam nyob qhov twg, mas koj lub siab yuav nyob qhov ntawd”, yog peb xav ntsoov txog dab tsi, mas peb lub tswv yim yuav dai rau yam ntawd, xws li peb pom tias niaj hnub no peb tej me tub me nyuam thaum lawv xyeej kiag, mas lawv tuav hlo xov tooj, lawv zaum kov xov tooj, ib hnub hnub tsis ua dab tsi, vim lawv muab lawv lub siab dai rau tej yam lom zem nyob hauv lub xov tooj.
Thaum peb xav kom lub neej nplua nuj, mas peb lub siab tsuas xav ntsoov tias yuav ua li cas thiaj yuav muaj. 
Tab sis Huab Tais Yes Xus qhia ntxiv tias “Nej txhob sau tej cuab tam nyob ntiaj teb no, lub txhab cuab tam nej yuav sau mas tsum yog lub txhab cuab tam nyob saum ntuj.”
Lub txhab cuab tam nyob ntiaj teb no yog nyiaj txiag, kev nplua nuj, suab npe, kev lom zem. 
Huab Tais Yes Xus ntuas kom peb txhob muab lub siab lub sij hawm dai ncuv rau cov txhab cuab tam no, vim muaj ib hnub tej no yuav ploj mus, peb yuav coj nrog peb mus rau lub neej tiam tom ntej tsis tau.
Lub txhab cuab tam saum ntuj yog kev tsim koob tsim hmoov rau yus tus kheej. Peb yuav nrhiav cov cuab tam no tau, mas yog ‘kev ua zoo’, ‘kev hlub thiab nyiam lwm tus’, ‘kev khuv leej thiab pab lwm tus’.
Peb yuav muab lub siab dai rau cov hauj lwm tsim koob hmoov tau, mas yog peb yuav tau kub siab nrhiav Tswv Ntuj, nrog Tswv Ntuj tham thiab mloog Tswv Ntuj lub suab hais qhia rau peb.
Kwv tij Hmoob, nej kav tsij muab nej lub siab dai rau cov hauj lwm npaj lub txhab cuab tam saum ntuj mog.
Nyob zoo sawv daws.