Zaj nyeem hnub tim 23 lub 8 hli 2023 (Daily reflection)

ZAJ NYEEM HNUB TIM 23 LUB 8 HLI, HNUB NCO TXOG LEEJ NTSHIAB LOS XAS NYOB LIS MAS
COV LUS NYOB HAUV MAS TAIS NTAWV MOO ZOO (MT 20: 1-16)

Kwv tij Hmoob sawv daws, thaum nej hnov lub Moo Zoo hauv hnub no nej xav li cas? Puas yog tus tswv teb ua tsis ncaj rau cov tub zog, puas yog tus tswv teb hlub cov neeg tuaj tom qab dua cov xub tuaj ua zog? Tsis tsim nyog tus tub zog ua hauj lwm ib hnub txwm nkaus yuav tau tus nqe zog ntau dua tus tub zog tuaj thaum twb yuav xaus hnub puas yog?
Peb yog neeg mas peb kawg yuav xav zoo li no, tab sis zaj no yog ib zag paj lug Huab Tais Yes Xus xav qhia txog Tswv Ntuj lub siab hlub neeg. Cov kwv tij, Huab Tais Yes Xus hais tias tus tswv teb nrog cov tub zog hais haum tias lawv tus nqe zog yog ib hnub ib lub txiaj nyiag, yog li tus tuaj ntxov los lig, nws tus nqe zog kuj yuav tau ntau tib yam. Qhov no yog Tswv Ntuj lub siab ncaj rau neeg, Tswv Ntuj tsis txiav tias tus neeg twg yuav ntseeg ntxov los lig, tsuav kom nws ntseeg xwb, mas nws yuav tau txais Tswv Ntuj lub Ceeb Tsheej zoo xws tib yam.
Huab Tais Yes Xus hais ntxiv tias tus tswv teb tawm mus ncig hauv cov zos 4 lwm ntxiv, nws pom cov neeg nyob dag tom tshav puam, nws hais kom lawv tuaj ua zog hauv daim teb, mas cov neeg ntawd zoo siab tuaj, lawv tsis yig. Qhov no kuj yog tsom txog Tswv Ntuj lub siab hlub neeg, Tswv Ntuj tawm tuaj hu peb txhua lub caij kom peb tig rov los ntseeg txog nws. 
Tus tswv teb muab tus nqe zog rau lawv ib leeg ib lub txiaj nyiag xws li tus tuaj ua hauj lwm puag thaum sawv ntxov txog txaus ntuj, mas txhais tias Tswv Ntuj hlub neeg sib luag zos, Tswv Ntuj tsis kws leej twg cai.
Kwv tij Hmoob, Huab Tais Yes Xus piav ntxiv tias cov xub tuaj ua ntej yws tias tus tswv ua tsis ncaj rau lawv vim lawv ua hauj lwm ib hnub hos tus tuaj tom qab ua ib teev xwb, ua cas nws tau nqe zog ntau ib yam li lawv cov ua ib hnub, ces tus tswv teb tias “Kuv tsis tau ua tsis ncaj rau koj, wb tsis tau hais haum tias ib hnub ib lub txiaj nyiag lod? Puas yog koj khib vim kuv siab zoo?”
Kwv tij Hmoob sawv daws, Tswv Ntuj xav kom peb ua zoo li Tswv Ntuj, zoo siab rau tus neeg tau txais nws tus nqe zog, tsis yog yuav khib lawv. Peb cov Tswv Ntuj tau hu los xub paub Tswv Ntuj mas peb yuav tsum nrog cov kwv tij nyuam qhuav ntseeg Ntuj zoo siab thaum lawv tau txais txiaj ntsim paj tshab ntawm Tswv Ntuj. 
Thov kom peb nco tias tus neeg twg muab hlob, nws ntxub luag tej, nws tsis xav kom lawv tau zoo dua nws, mas Tswv Ntuj yuav rho nws tawm hauv Tswv Ntuj lub Ceeb Tsheej mus.
Nyob zoo sawv daws.