Zaj nyeem hnub tim 24 lub 10 hli 2023 (Daily reflection)

ZAJ NYEEM HNUB TIM 24 LUB 10 HLI, HNUB NCO TXOG LEEJ NTSHIAB TUAM MAB LIAB NKAS LES

COV LUS NYOB HAUV LUS KAS NTAWV MOO ZOO (LK 12: 35-38)

Kwv tij Hmoob, thaum nej ntiav ib co tub zog mus ua nej daim teb tab sis lawv tsis rau siab ua mas nej yuav xav li cas? Los yog thaum muaj ib tug neeg tuaj ntiav nej mus ua nws daim teb, thaum tus ntiav nej ntawd rov los tsev lawm, nej pheej so ntev ntev tsis muab siab rau ua teb, nws tuaj txog nws puas zoo siab rau nej; hos yog nej rau siab ntso ua teb kom tiav, thaum nws tuaj pom mas nws puas yuav yws nej?

Zaj paj lug hnub no Huab Tais Yes Xus hais mas piv zoo li ntawd. 

Kwv tij, peb ua neej nyob mas peb tos ntsoov saib Tswv Ntuj yuav tuaj hu peb rov hnub twg, peb kuj tsis paub tias thaum twg peb thiaj mam tau ntsib Tswv Ntuj. Yog li Huab Tais Yes Xus thiaj ntuas kom peb sia siv thiab taws teeb zov hmo.

Sia siv taws teeb zov hmo li cas?

Kwv tij, raws li lub Koom Txoos muab nthuav rau peb paub mas yog kom peb muab siab rau teev Ntuj, mloog Tswv Ntuj Lus, thov Ntuj, ua cov hauj lwm sis nyiam sis hlub. Peb niaj hnub ua li ntawd xws li hnub no yog hnub kawg hauv peb txoj sia, tsis muaj tag kis ntxiv. 

Tab sis vim Tswv Ntuj hlub peb, Tswv Ntuj thiaj tseem niaj tag kis pub txoj sia tshiab rau peb kom tau ib lub cib fim los hloov siab tshiab, kom tau ib lub caij zoo rau peb rov zov mov. Yog li mas peb txhob muab xav tias tseem tshuav ntau hnub kuv mam tso lub ntiaj teb no tseg, tos kuv laus laus thiab so hauj lwm tso, kuv mam mus teev Ntuj, mam mus mloog Txiv Plig nthuav Tswv Ntuj Lo Lus, mam muab siab nrog Tswv Ntuj sib tham, mam muab lub sij hawm ntawd mus pab luag tej. Txhob xav li ntawd, tsam lig dhau.

Nyob zoo sawv daws.