Zaj nyeem hnub tim 24 lub 11 hlis 2023 (Daily reflection)

ZAJ NYEEM HNUB TIM 24 LUB 11 HLIS, HNUB NCO TXOG LEEJ NTSHIAB AS NRES DOOS LAS THIAB COV TIM KHAWV NYAB LAJ
COV LUS NYOB HAUV LUS KAS NTAWV MOO ZOO (LK 19: 45-48)

Kwv tij Hmoob, lub Moo Zoo hais tias thaum Huab Tais Yes Xus tuaj txog Yes Lus Xas Les, nws chaws mus hauv lub Tuam Tsev Teev Ntuj. Huab Tais Yes Xus pom tias nyob sab hauv, mas muaj neeg coob coob tuaj nyob puv qhov txhia chaw. Lawv tsis yog tuaj teev Ntuj, tab sis yog tuaj ua luam. Huab Tais Yes Xus npau taws, nws ntiab cov tub luam tawm hauv lub Tuam Tsev Teev Ntuj mus.
Kwv tij, ib txhiab xyoo ua Yes Xus ntej, cov Yus Das tus vaj hu ua ‘Xas Los Moos’ txhim lub Tuam Tsev Teev Ntuj nyob hauv lub tsheej Yes Lus Xas Les cia rau cov Yus Das tau tuaj teev Huab Tais Tswv Ntuj. Nyob hauv lub Tuam Tsev Teev Ntuj muaj ib kem ntshiab cia rau lub Xab Cog Lus, muaj lub tshav puam cia hlawv cov tsiaj txi Ntuj. 
600 xyoo ua Yes Xus ntej, cov Npas Npis Los tuaj txeeb tau lub tsheej Yes Lus Xas Les, lawv rhuav lub Tuam Tsev Teev Ntuj, ces 50 xyoo tom qab cov Yus Das mam rov txhim dua lub tshiab. Lawv txhim tiav yog xyoo 515 ua Yes Xus ntej.
Xyoo 167 ua Yes Xus ntej, tus vaj Hes Las coj cov mlom dab Hes Las tuaj txawb rau hauv lub Tuam Tsev Teev Ntuj rau cov Yus Das teev. Tom qab Yus Das Mas Kas Npes ntiab cov Hes Las tawm hauv lub teb chaws mus, nws tau ntxuav lub Tuam Tsev Teev Ntuj kom rov ntshiab.
20 xyoo ua Yes Xus ntej, tus vaj Hes Los rov kho lub Tuam Tsev Teev Ntuj dua.
Cov kwv tij, pom tias ib txwm los lub Tuam Tsev Teev Ntuj yog qhov chaw cov Yus Das tuaj teev Tswv Ntuj thiab ua kab ke txi Ntuj, lawv saib yog thaj chaw ntshiab. Tab sis cov Thawj Leej Choj tuav tes nrog cov tub luam muab ua lub kiab muag tej tsiaj cia txi Ntuj, mas cov Yus Das tuaj txi Ntuj thiaj tsis ceeb laj cab tej yam tej tshis puag lawv teb chaws tuaj rau Yes Lus Xas Les. Lawv tsuas npaj nyiaj tuaj xwb, tuaj txog ces xaiv saib nyiam tus tsiaj twg mam yuav coj los tua txi Ntuj nyob ntawd xwb. Lawv tsis nco tias Tswv Ntuj tsis nyiam kom lawv ua li ntawd, qhov Tswv Ntuj nyiam yog kev teev Ntuj. 
Kwv tij Hmoob, peb muab tig xav saib niaj hnub chiv peb musk oom lub Txoos teev Ntuj, peb pua tau ua kom xis Tswv Ntuj siab; peb puas npaj lub siab kom ntshiab txaus mus mloog Tswv Ntuj Lo Lus, peb puas muab tas peb lub siab los teev Ntuj, peb puas koom nrog Huab Tais Yes Xus txi Ntuj ua ke. 
Nyob zoo sawv daws.