Zaj nyeem hnub tim 24 lub 8 hli 2023 (Daily reflection)

ZAJ NYEEM HNUB TIM 24 LUB 8 HLI, HNUB UA HMOOV LEEJ NTSHIAB NPAS TOS LOS MAS YOS
COV LUS NYOB HAUV ZAM NTAWV MOO ZOO (Z 1: 45-51)

Kwv tij Hmoob sawv daws, hnub no peb lub Koom Txoos ua hmoov Leej Ntshiab Npas Tos Los Mas Yos, nws yog ib tug hauv lawv 12 tug Hauv Paus Xa Lus.
Cov neeg ntseeg hais tias Npas Tos Los Mas Yos yog Nas Tas Nais uas Zam tau hais tseg nyob hauv nws phau ntawv Moo Zoo. Lub npe ‘Npas Tos Los Mas Yos’ txhais tias ‘Tos Los Mas Yos tus tub’ yog li thiaj ntxim yog lub npe xeem tsis yog lub npe neeg. Yog vim li ntawd, tej zaum Npas Tos Los Mas Yos lub npe thiaj yog ‘Nas Tas Nais’, ces peb thiaj yuav hai tau ua ke tias ‘Nas Tas Nais, Tos Los Mas Yos tus tub’.
Lub Moo Zoo hnub no yog piav txog thaum Fis Lis Pos coj Nas Tas Nais tuaj ntsib Huab Tais Yes Xus. Ua ntej ntawd mas nws tsis ntseeg tias Huab Tais Yes Xus yog tus Mes Xias uas Mais Xes thiab cov yaj saub tau hais txog, tab sis thaum Huab Tais Yes Xus hais rau Nas Tas Nais txog qhov Fis Lis Pos mus hu Nas Tas Nais ces Nas Tas Nais thiaj ntseeg txog Huab Tais Yes Xus. Ces Huab Tais Yes Xus hais rau Nas Tas Nais thiab lawv tias lawv yuav pom ntuj qhib, lawv yuav pom Tswv Ntuj cov Tshiab nce thiab nqes los.
Kwv tij Hmoob, yog hnub ntawd Nas Tas Nais tsis ntseeg, mas nws yuav tsis pom tej xwm Huab Tais Yes Xus hais ntawd. Ib yam li peb sawv daws, peb xav pom Huab Tais Yes Xus, mas peb tsum ntseeg tiag tiag tias Huab Tais Yes Xus nyob nrog peb.
Kwv tij, hnub no peb yuav ua Tswv Ntuj tsaug thiab peb yuav zoo siab mog, vim Tswv Ntuj tau tshoj tej tus neeg kom tuaj coj peb mus paub Huab Tais Yes Xus xws li Fis Lis Pos tau coj Nas Tas Nais mus ntsib Huab Tais Yes Xus, ces Nas Tas Nais zoo siab ntseeg txog Yes Xus.
Nyob zoo sawv daws.