Zaj nyeem hnub tim 25 lub 11 hlis 2023 (Daily reflection)

ZAJ NYEEM HNUB TIM 25 LUB 11 HLIS, HNUB NCO TXOG LEEJ NTSHIAB KAS TAS LIS NAS NYOB AS LES XAS NRIAS
COV LUS NYOB HAUV LUS KAS NTAWV MOO ZOO (LK 20: 27-40)

Cov kwv tij Hmoob, peb cov Hmoob thaud mas tau ua neej nyob nrog ntau haiv neeg ntau txoj kev teev hawm, mas Hmoob thiaj muaj ntau zaj hais txog lub neej tom qab tso lub ntiaj teb no tseg. Ib co hais tias tuag lawm yuav mus cuag poj cuag yawm nrog lawv nyob, ib co hais tias tuag tas mas tus plig yuav mus thawj thiab ua neeg los tsiaj txhu raws li tu plig tau hais rau yawg Nyuj Vaj Tuam Teem, ib co hais tias tuag tas yuav mus ua dab ua sw nyob zov lub cev tim qhov ntxa; tus hais li cas los muaj. Nyob hauv haiv His Xas Lais kuj muaj zoo li ntawd, ib co hais tias tuag lawm tsis muaj yuav sawv rov los, ib co hais tias tuag tas mas txog hnub kawg Huab Tais Tswv Ntuj yuav tsa sawv daws sawv.
Nyob hauv peb cov ntseeg txog Yes Xus, peb ntseeg raws li Huab Tais Yes Xus qhia. Hnub no Huab Tais Yes Xus hais tias muaj ib hnub sawv daws yuav sawv rov los txais txoj sia nyob mus li. Thaum ntawd sawv daws yuav zoo li cov Tshiab, sawv daws yuav zoo li tib pab kwv tij lawm xwb.
Kwv tij Hmoob, peb cov ua Ntuj kev cai mas peb ntseeg li ntawd.
Cov kwv tij, thaum peb tseem nyob ntiaj teb no; peb muaj yug, muaj mob, muaj tuag, peb kuj muaj kev sib hlub sib ntshaw nyob ua txij nkawm. Tab sis nyob rau lub neej fab lwm tiam, peb tsis muaj yug muaj mob los tuag lawm, peb kuj tsis muaj kev sib qaws ua txij nkawm lawm thiab. Peb tsuas muaj txoj sia nyob mus li lawm xwb, peb tsuas muaj kev sib nyiam xyiv fab mus li xwb.
Qhov no peb tsis tau mus pom, peb tsuas hais raws li Huab Tais Yes Xus qhia xwb; tab sis peb yuav saj tau nyob hauv lub ntiaj teb no yog tias peb ua neej nyob peb txawj sib nyiam xws li ib cuab kwv tij, tsis yog sib hlub xws li nkauj nraug, peb ib tug txawj pab ib tug yam dawb paug, ib tug nres ib tug lub siab.
Nyob zoo sawv daws.