Zaj nyeem hnub tim 26 lub 10 hli 2023 (Daily reflection)

ZAJ NYEEM HNUB TIM 26 LUB 10 HLI, HNUB TSIB LUB LIS PIAM 29 CAIJ NYOB NRUAB XYOO

COV LUS NYOB HAUV LUS KAS NTAWV MOO ZOO (LK 12: 49-53)

Kwv tij Hmoob, thaum nej hnov Huab Tais Yes Xus lo lus tias “Kuv coj ib co hluav taws tuaj rau lub ntiaj teb, kuv yeej xav kom cov hluav taws ntawd twb cig lawm”, mas nej xav li cas?

Nej puas yuav hais tias yog Huab Tais Yes Xus xav muab lub ntiaj teb no hlawv kom neeg tuag mus kom tag.

Kwv tij, nyob hauv Ntawv Ntshiab, ‘hluav taws’ yog ib yam tsom txog Tswv Ntuj; xws li Mais Xes pom Tswv Ntuj nyob hauv tsob pos cig nyob hauv teb chaws suab puam, Leej Ntuj Plig zoo li ib co hluav taws nqes los saum cov thwj tim, thaum Huab Tais Yes Xus nthuav lub ntsiab lus rau ob tug thwj tim tab tom mus taum Es Mas Ws tas mas nkawd lub siab kub lug cuag hluav taws.

Hluav taws hauv lub Moo Zoo hnub no, thiaj yog Huab Tais Yes Xus tab tom hais txog Tswv Ntuj; Huab Tais Yes Xus coj Tswv Ntuj Lo Lus tuaj txog ntiaj teb neeg lawm, Huab Tais Yes Xus xav kom tas sawv daws tau hnov Tswv Ntuj Lo Lus muaj lub siab kub lug xav mus tshaj lub Moo Zoo, xav mus tseb Tswv Ntuj kev nyiam rau lub ntiaj teb. Thaum tas lub ntiaj teb paub txog Tswv Ntuj lawm, lub ntiaj teb thiaj yuav thaj yeeb thiab sawv daws lub siab yuav nyob kaj lug.

Tab sis vim lub ntiaj teb neeg sawv daws tsis tau paub Tswv Ntuj, mas thiaj tseem muaj kev sib tawm tsam, muaj kev sib ncaim, mas Huab Tais Yes Xus thiaj hais ntxiv tias nyob hauv ib yim neeg, yuav muaj kev sib ncaim, ib tug yuav tiv ib tug.

Cov kwv tij, tos muaj kev sib tiv tsis sib haum nyob hauv ib yim neeg, vim tias Tswv Ntuj yog kev nyiam, Tswv Ntuj yog qhov zoo; tab sis ib txwm neeg lub siab pheej xib rau kev phem, mas tus xav phem thiaj sawv los tiv tus xav zoo.

Peb yog tus paub Tswv Ntuj, peb tiv tus phem tab sis peb txhob cais tus phem, peb yuav tau nyiam nws, zam rau nws, ua siab ntev qhuab qhia nws, mas muaj ib hnub nws thiaj tig los yuav lub siab tshiab, nws thiaj yuav pom Tswv Ntuj. Kev thaj yeeb thiaj yuav nyob hauv peb sawv daws mog.

Nyob zoo sawv daws.