Zaj nyeem hnub tim 26 lub 6 hlis 2023 (Daily reflection)

ZAJ NYEEM HNUB TIM 26 LUB 6 HLIS, HNUB OB LUB LIS PIAM 12 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 7: 1-5)

Cov kwv tij, nyob rau lub ntiaj teb no peb pom tias neeg nyiam txiav txim rau neeg. Tej tus txiv mus raws qhov ncaj, tej tus kuj txiav mus raws luag lwm tus lub hwj chim, tej tus kuj txiav raws nws lub siab, tej tus txiav raws li nws qhov muag pom, tej tus txiav raws li luag tej hais. Tab sis hnub no Huab Tais Yes Xus hais qhia peb tias “Koj txhob txiav txim rau lwm tus, Ntuj thiaj yuav tsis txiav txim rau koj.” 
Huab Tais Yes Xus hais zoo li no, yog li thaum peb pom tej tus neeg ua txhaum, ua phem, ua tsis yog, ua yuam kev; peb yuav ua li cas rau nws?
Kwv tij, qhov Huab Tais Yes Xus xav qhia peb mas yog kom peb muab txoj kev nyiam kev hlub saib ua qhov loj, mas peb yuav ‘zam’ rau cov neeg tau ua txhaum los yog ua yuam kev ntawd, peb qhia los yog ntuas lawv kom txhob ua txhaum ntxiv lawm. Yog peb zam rau luag, mas Tswv Ntuj thiaj yuav zam rau peb.
Kwv tij, yog li tus neeg ua txoj hauj lwm hais plaub ntug, nws ho yuav ua li cas?
Nws kuj yuav ua mus raws lub teb chaws tsab cai txiav plaub, tiam sis thaum nws soj ntsuam txog qhov tseeb, nws kuj yuav ua lub siab kom ncaj thiab txiav mus raws txoj kev nyiam kev hlub; xws li peb pom nyob hauv ib tsab xov xwm tias muaj ib tug yawg laus tsav tsheb hla teeb liab, ces luag coj nws mus kom rau lub tsev hais plaub. Tus kws hais plaub nug tias ua cas thaum tus yawg ntawd pom lub teeb liab, nws tsis ntses tsheb tos txog teeb ntsuab tso. Tus yawg laus teb tias vim nws maj coj nws tus tub mob hnyav mus nrhiav kws tshuaj, nws ua ib siab pom tus tub tuag tsis tau. Tus kws hais plaub pom qhov tseeb li ntawd, nws qhuas txog tus yawg laus ntawd txoj kev hlub, ces nws txiav tias tus yawg laus ntawd tsis txhaum.
Kwv tij, los li peb pom nyob hauv zaj cov neeg coj tus poj niam deev hluas tuaj rau Huab Tais Yes Xus, saib Huab Tais Yes Xus yuav hais li cas. Zaj no peb twb paub tias Huab Tais Yes Xus tsis muab txim rau tus poj niam ntawd, Huab Tais Yes Xus tsuas hais rau tus poj niam tias “Txij no mus koj txhob ua txhaum ntxiv lawm mog.”
Vam tias cov lush nub no yuav ua lub teeb kaj sawv daws lub tswv yim mog.
Nyob zoo sawv daws.