Zaj nyeem hnub tim 27 lub 10 hli 2023 (Daily reflection)

ZAJ NYEEM HNUB TIM 27 LUB 10 HLI, HNUB RAU LUB LIS PIAM 29 CAIJ NYOB NRUAB XYOO

COV LUS NYOB HAUV LUS KAS NTAWV MOO ZOO (LK 12: 54-59)

Kwv tij Hmoob sawv daws, nyob hauv lub teb chaws His Xas Lais, mas sab hnub poob puas lub hiav txwv Mes Dis Tes Las Nes, sab qab teb yog lub hav suab puam Xis Nais; yog li mas hnub twg lawv pom huab sawv ntxoov sab hnub poob mas ib me ntsis yuav muaj nag los, tab sis hnub twg cua ntsawj nram sab qab teb tuaj mas yuav coj cov cua kub cua sov tuaj. Lawv ib txwm pom li ntawd, mas lawv paub.

Hnub no Huab Tais Yes Xus thiaj hais rau lawv tias ua cas lawv twb paub ntsuas ntuj ntsuas teb tab sis ua cas lawv tsis paub ntsuas lub zim txwv.

Qhov tseeb, mas yog Huab Tais Yes Xus xav hais rau lawv tias ua cas lawv pheej yuav mus xav txog tej yam nyob deb lawv, tsim nyog lawv yuav tig los saib yam ze ze lawv, saib tej yam lawv tab tom ua ziag no; vim yam lawv tab tom ua no yuav tsheej xeeb tau qhov zoo los qhov phem rau lawv lawm yav tom ntej.

Kwv tij, piv li peb pom tias hnub no ntuj yuav los nag tab sis peb tawm rooj peb tsis npaj lub kaus, mas peb puas yuav ntub nag los tsis ntub. Piv li peb paub tias nrog ib tug neeg phem sib cav mas ib ntsis yuav muaj lus, peb puas tseem yuav nrog nws sib cav ntxiv.

Hnub no, Huab Tais Yes Xus xav ntuas peb kom paub ntsuas peb thiab lwm tus lub siab tias tab tom zoo li cas, peb puas yog tab tom poob rau qhov phem los tseem nyob rau qhov zoo, luag ne tab tom muaj lub tswv yim zoo los phem rau peb.

Kwv tij, hnov tseeb mas peb kawg paub peb xwb, ceeb laj paub lwm tus lub siab; yog li mas Huab Tais Yes Xus thiaj xav kom peb ‘sim zam’ thiab ‘rov sib haum xeeb’ mas yuav zoo dua rau peb thiab rau lwm tus.

Nyob zoo sawv daws.