Zaj nyeem hnub tim 27 lub 12 hlis 2023 (Daily reflection)

ZAJ NYEEM HNUB TIM 27 LUB 11 HLIS, HNUB OB LUB LIS PIAM 34 CAIJ NYUAB NRUAB XYOO
COV LUS NYOB HAUV LUS KAS NTAWV MOO ZOO (LK 21: 1-4)
Kwv tij Hmoob sawv daws, lub lis piam no yog lis piam kawg hauv lub xyoo teev Ntuj xyoo no. Tus Hauv Paus Xa Lus Lus Kas yuav piav txog Huab Tais Yes Xus nyob hauv lub Tuam Tsev Teev Ntuj hauv lub tsheej Yes Lus Xas Les. 
Nyob hauv lub Tuam Tsev Teev Ntuj, yuav muaj 13 lub txhab ceev nyiaj txawb cia hauv cov mom kaum lub Tuam Tsev Teev Ntuj cia rau sawv daws tau tso cov nyiaj pub rau lub Tuam Tsev Teev Ntuj. Cov neeg tuaj hauv lub Tuam Tsev Teev Ntuj, sawv daws yuav pub nyiaj rau hauv cov txhab ceev nyiaj ntawd.
Huab Tais Yes Xus thiab nws cov thwj tim nyob ntawm ib cag, lawv ntsia cov neeg mus mus los los, lawv pom cov neeg tso nyiaj rau hauv cov txhab ceev nyiaj; tus muaj ntau muab ntau, tus muaj tsawg muab tsawg. Tej zaum cov thwj tim yuav hais lus qhuas cov neeg nplua nuj uas pub nyiaj ntau rau hauv lub txhab ceev nyiaj. Lawv tsis nco pom cov pluag. Thaum ntawd, muaj ib tug poj ntsuam pluag txom nyem muab 2 lub txiaj tso rau hauv. Huab Tais Yes Xus xav ntuas cov thwj tim kom txhob saib neeg sab nraud, tab sis tsum saib hauv neeg nruab siab, mas Huab Tais Yes Xus thiaj hais rau cov thwj tim tias tus poj ntsuam ntawd tau tso nyiaj rau hauv lub txhab ceev nyiaj ntaus dua sawv daws. 
Kwv tij Hmoob, yog peb nrog cov thwj tim sawv ua ke ntawd, mas ntshe peb yuav xav tias ua cas tus neeg tso 2 lub txiaj xwb thiaj yog tus muab ntau dua cov tso 10 los 100 lub txiaj?
Kwv tij, yog peb ntsia sab nraud uas neeg qhov muag pom, mas peb yuav xav li ntawd tiag, tab sis Huab Tais Yes Xus saib hauv neeg nruab siab, Huab Tais Yes Xus paub tias tus poj ntsuam ntawd muab tas nrho nws lub cuab tam los tso rau hauv lub txhab ceev nyiaj, tsis zoo li cov neeg nplua nuj uas lawv rho cov nyaj seem los pub rau hauv lub txhab ceev nyiaj.
Yog peb ua tib zoo xav ntxiv, peb yuav pom tias tos tus poj ntsuam pluag ntawd muab tas nws lub cuab tam pub rau lub Tuam Tsev Teev Ntuj, mas vim nws txom nyem dhau, nws tsis muaj txiv los tej me nyuam ua chaw vam khom ntiv, qhov nws vam khom txog tsuas yog Tswv Ntuj tus nyob hauv lub Tuam Tsev Teev Ntuj xwb. Nws thiaj yeem pub tas nrho nws ob lub txiaj uas yog tag nrho nws lub cuab tam rau Tswv Ntuj.
Kwv tij, nyob hauv peb mas peb yuav tau yoog raws li tus poj ntsuam no. Txhua hnub peb yuav khaub zig Tswv Ntuj, cev tas peb lub neej, peb txoj sia, peb cov hauj lwm rau Tswv Ntuj ua tus saib xyuas. Peb muab tas nrho yam peb muaj qee rau Tswv Ntuj, mas muaj ib hnub Tswv Ntuj yeej yuav pauj rov rau peb. Nyob zoo sawv daws.