Zaj nyeem hnub tim 27 lub 2 hlis 2023 (Daily reflection)

ZAJ NYEEM HNUB TIM 27 LUB 2 HLIS, HNUB OB LUB LIS PIAM 1 CAIJ
PLAUB CAUG
COV LUS NYOB HAUV MAS TAIS NTAWV MOO ZOO (MT 25: 31-46)

Kwv tij Hmoob sawv daws, lub lis piam no yog thawj lis piam hauv lub caij
Plaub Caug. Lub caij Plaub Caug yog lub caij cia rau peb sawv daws tau
tsim koob hmoov cia nyob hauv lub ntiaj teb no, mas txog hnub ntiaj teb
kawg ntawm peb, peb thiaj yuav tau mus nyob pem Ntuj Ceeb Tsheej.
Hnub no Huab Tais Yes Xus qhia peb tias thaum peb tus plig tso lub cev no
tseg lawd, peb yuav tau mus pom Huab Tais Yes Xus nyob ntawm lub rooj
txiav txim. Huab Tais Yes Xus yuav tshuaj xwm txog peb lub neej thaum
muaj sia nyob, saib peb puas tau tsim koob hmoov tseg los tsis tau. Tus
neeg twg tsim koob hmoov tseg cia mas nws yuav mus nyob pem Ntuj, tus
neeg twg tsis tau tsim koob hmoov mas nws yuav poob rau hauv cov hluav
taws tsis txawj kuj mus ib txhis.
Kwv tij, lo lus ‘tsim koob hmoov’ hauv txoj kev ntseeg, yog hais txog kev
‘nyiam’ lwm tus thaum yus tseem muaj txoj sia nyob. Ib tug yuav tsim koob
hmoov rau lwm tus tsis tau; kuv tsim koob hmoov rau koj, koj tsis koob
hmoov rau kuv mas tsis tau. Tsuas yog yus tus kheej xwb thiaj rov tsim rau
yus tau.
Peb yuav tsim koob hmoov rau peb tau li cas?
Huab Tais Yes Xus hais tias cov neeg tsim koob hmoov mas lawv yog cov
tau ua li no “kuv tshaib plab, nej pub rau kuv noj; kuv nqhis dej, nej pub rau
kuv haus; kuv yog ib tug qhua, nej txais kuv; kuv liab qab, nej muab rau kuv
hnav; kuv raug kaw hauv tsev nkuaj tsev loj fab, nej tuaj tsham kuv.”
Cov kwv tij, lub caij Plaub Caug no, thov kom peb rov tig los soj ntsuam
peb, saib peb puas tau ua zoo li Huab Tais Yes Xus cov lus ntawd; peb puas
tau hlub puas tau nyiam lwm tus ua txom nyem dua peb, pluag dua peb,
raug kev iab hiam dua peb.

Kwv tij, peb ntsia puas pom cov neeg txom nyem, cov pluag, cov raug iab
hiam ntawd?
Peb pheej xav ntsoov tias ‘puas yuav muaj tus txom nyem dua kuv, los yog
pluag dua kuv; kawg kuv xwb thiaj txom nyem thiab pluag pluag, vim tias
niaj hnub no kuv twb tsis muaj noj tsis muaj hnav, kuv twb tsis tau ib daig
tawv zoo los sia!’
Yog peb tseem niaj hnub xav li no, pom zoo li no, mas nyob hauv lub caij
Plaub Caug no, peb yuav nquag teev Ntuj thiab thov Ntuj, kom Tswv Ntuj
qhib peb lub tswv yim thiab lub siab, kom peb ntsia pom tus neeg txom
nyem dua peb, kom peb pom tias tseem muaj cov pluag pluag tsis muaj
noj muaj haus tshaj peb, kom peb pom tias tsis yog peb xwb thiaj yog tus
raug iab hiam, tseem tshuav ntau txhiab leej nyob hauv kev quaj ntsuag,
lawv tos ntsoov kev nyiam kev hlub ntawm peb.
Nyob zoo sawv daws.